राष्ट्रवादीच्या नगरसेवकांत दिलजमाई

गडहिंग्लज नगरपालिका ः एकदिलाने राहण्याचे मुश्रीफांचे आवाहन

सकाळ वृत्तसेवा
गडहिंग्लज, ता. ३ ः येथील नगरपरिषदेत सत्तेवर येऊन तीन महिन्यांच्या आतच विविध कारणांमुळे सत्तारूढ राष्ट्रवादीच्या नगरसेवकांमधील मनभेद चव्हाट्यावर आले होते. अखेर पक्षाचे नेते मंत्री हसन मुश्रीफ यांनी दोन्ही बाजूंच्या नगरसेवकांना कोल्हापुरात बोलावून त्यांच्यात दिलजमाई घडविल्याचे सांगण्यात आले. उद्या (ता. ४) होणाऱ्या विकासकामांच्या लोकार्पण कार्यक्रमाच्या पार्श्वभूमीवर झालेली ही दिलजमाई महत्त्वपूर्ण आहे.
नगरपालिकेतील सत्तेची सूत्रे राष्ट्रवादीकडे आल्यानंतर महिन्याभरातच विकासकामांच्या वाटपावरून नगरसेवकांतील धुसफूस बाहेर आली. त्यानंतर मंत्री मुश्रीफ यांनी बैठक घेऊन सर्वांनाच ताकीद दिली होती. त्यानंतर येथे झालेल्या जाहीर कार्यक्रमातही या अंतर्गत वादाचा धागा पकडून प्रसंगी हंटर घेण्याचा इशारा मुश्रीफ यांनी दिला होता. दरम्यान, पालिकेच्या विषय सभेत निधी दुसरीकडे वळविणे व पदाच्या सन्मानावरून पुन्हा सत्तारूढांमध्येच जुगलबंदी रंगली. याद्वारे एकमेकांमधील बेदिली चव्हाट्यावर आली. गडहिंग्लजकरांनी मोठ्या विश्वासाने दिलेल्या सत्तेचे रूपांतर एकमेकांतील मनभेदात होत असल्याबद्दल नाराजी व्यक्त करून एकदिलाने शहराच्या विकासाची अपेक्षा शहरवासीयांनी केली होती. पक्षाला ऊर्जितावस्था आणणाऱ्या जिवलग मित्रांमध्येही या मनभेदाने दुरावा निर्माण झाला. नेते मुश्रीफ यांचा वाढदिवसही त्यांच्याच नगरसेवकांकडून स्वतंत्रपणे साजरा झाला. या साऱ्या घडामोडींच्या पार्श्वभूमीवर मुश्रीफ यांनी दुसऱ्यांदा पक्षाच्या नगरसेवकांना सबुरीचा सल्ला दिल्याने आता बैठकीत केलेली दिलजमाई प्रत्यक्ष पालिका कामकाज व सभागृहात दिसेल, अशी अपेक्षा आहे.
.........
चौकट...
मी माफ केलंय, आता मागचं विसरा
दरम्यान, ही बेदिली मुश्रीफ यांच्यापर्यंत पोहोचल्याने त्यांनी पक्षाच्या नगरसेवकांना कोल्हापुरात बोलावून घेतले होते. ‘आतापर्यंत घडलेल्या प्रकाराबद्दल मी मोठ्या मनाने माफ केलं आहे. आता मागचं सगळं विसरून पुढे जा. एकदिलाने काम करा,’ असा सल्ला मुश्रीफ यांनी नगरसेवकांना दिल्याचे सांगण्यात आले. त्यामुळे उद्याच्या (ता. ४) विकासकामांच्या लोकार्पण कार्यक्रमात व्यासपीठावर राष्ट्रवादीतील एकजुटीच्या दर्शनाकडे शहरवासीयांचे लक्ष लागले आहे.