रस्ते, पाणंद खुली करा,
अन्यथा ६ मेपासून उपोषण
‘राज्य शिवपानंद शेतरस्ता चळवळ’ची मागणी

कोल्हापूर, ता. १६ : जिल्ह्यातील गाव नकाशे व सर्वे नकाशांवर नोंद असलेले शासकीय रस्ते आणि पाणंदी अतिक्रमणमुक्त करून तत्काळ खुले करावेत, अशी मागणी ‘राज्य शिवपाणंद शेतरस्ता चळवळ’ने केली आहे. या मागण्यांसाठी ६ मे पासून जिल्हाधिकारी कार्यालयासमोर बेमुदत उपोषणाचा इशारा संघटनेचे कृष्णात जाधव यांनी दिला.
ते म्हणाले, जिल्ह्यात अनेक ठिकाणी नकाशावर नोंद असलेले रस्ते प्रत्यक्षात अतिक्रमणामुळे बंद आहेत. प्रशासनाने कोणत्याही तक्रारीची वाट न पाहता या रस्त्यांवरील अतिक्रमणे हटवून ते खुले करावेत, अतिक्रमणधारकांना सात दिवसांचा अल्टिमेटम देऊन त्यानंतर सक्तीची कारवाई करावी, अशीही मागणी केली. अतिक्रमण कायम ठेवल्यास संबंधितांवर फौजदारी कारवाई करावी, तसेच अशा धारकांची डिजिटल नाकेबंदी करून ‘फार्मर आयडी’ ब्लॉक करण्याची मागणी केली आहे. तसेच अतिक्रमणाला प्रोत्साहन देणाऱ्या अधिकाऱ्यांवर कारवाई करावी, असेही जाधव यांनी सांगितले. यावेळी बाजीराव पाटील, उत्तम जाधव, बाळू पाटील, कृष्णात पाटील, मारुती खाडे उपस्थित होते.