41739

जिल्हा बार असोसिएशन पदाधिकाऱ्यांची ‘सकाळ’ला भेट
खंडपीठ आंदोलनातील दै. ‘सकाळ’च्या पाठबळाबद्दल आभार

कोल्हापूर, ता. ६ ः सर्किट बेंच मागणीसाठी चाळीस वर्षापासूनचा संघर्ष फळाला आला. लवकरच पूर्ण खंडपीठही होण्याची आशा आहे. या लढ्यामध्ये दै. ‘सकाळ’ने वेळोवेळी पाठबळ दिले. यापुढेही वकिलांच्या प्रश्नांच्या सोडवणुकीसाठी ‘सकाळ’ने पाठिंबा द्यावा; अशा अपेक्षा जिल्हा बार असोसिएशनच्या नूतन कार्यकारिणीने व्यक्त केल्या.
जिल्हा बार असोसिएशन निवडणुकीनंतर नूतन कार्यकारिणीने आज ‘सकाळ’ कार्यालयाला भेट दिली. अध्यक्ष ॲड. राजेंद्र मंडलिक, उपाध्यक्ष ॲड. संजय घाटगे, सचिव ॲड. विरेंद्रसिंह निंबाळकर यांच्यासह कार्यकारिणी सदस्य उपस्थित होते. ‘सकाळ’चे संपादक निखील पंडितराव यांनी स्वागत केले. ‘सकाळ’चे संस्थापक कै. ना. भी. परूळेकर यांच्या प्रतिमेला अभिवादन करण्यात आले.
नूतन अध्यक्ष ॲड. मंडलिक म्हणाले, ‘‘वकिलीचे शिक्षण पूर्ण करून दरवर्षी दोनशेहून अधिक तरुण या क्षेत्रात उतरत आहेत. मोठ्या संख्येने येणाऱ्या वकिलांना तितक्या प्रमाणात काम मिळवून देण्यासाठी जिल्हा बार असोसिएशनला प्रयत्न करावे लागतील. सर्किट बेंचमध्ये काम करण्यासाठी नव्या वकिलांना प्रोत्साहन देण्यासाठी कार्यशाळांचेही आयोजन केले जाईल. खंडपीठाचा टप्पा गाठण्यासाठी सहा जिल्ह्यांतील वकिलांसोबत चर्चा करून पुढील दिशा ठरविणार आहोत.’’ महिला वकिलांना न्यायसंकुलामध्ये बैठक व्यवस्थाही उपलब्ध करून देण्यास प्राधान्य देऊ; असे मंडलिक यांनी सांगितले. यावेळी महिला प्रतिनिधी शुभांगी निंबाळकर, सहसचिव अवधूत पाटील, लोकल ऑडीटर सर्वेश भांदिगरे, कार्यकारिणी सदस्या पूनम पाटील- हुनूरे, राजवर्धन जाधव, संदीप वाईंगडे, श्रृतिका पाटील, श्रावणी पारसनीस, चैत्राली गुरव, सिद्धार्थ हुकेरी, वैभव गोरडे उपस्थित होते.