41923
कोल्हापूर ः महापालिकेच्या घरफाळा विभागाने कर आकारणी नसलेल्या मिळकतींचे मोजमापही घेण्यास सुरुवात केली आहे.
--
घरफाळाच नसलेल्या २०४ मिळकती
सहा दिवसांत शोध; एकूण २९९ मिळकतींसाठी प्रक्रिया

कोल्हापूर, ता. ७ : घरफाळा विभागाने शहरात घरफाळा नसलेल्या, नियमबाह्य बदल केलेल्या मिळकतींच्या शोधासाठी सुरू केलेल्या विशेष मोहिमेच्या सहा दिवसांत तब्बल २९९ मिळकतींचा शोध लावला आहे. त्यातील २०४ मिळकतधारकांनी घरफाळाच लावलेला नव्हता. आयुक्त डॉ. राजेंद्र भारूड यांच्या आदेशानुसार ३० मेपर्यंत ही मोहीम राबविण्यात येत आहे.
चारही विभागीय कार्यालयांमार्फत लिपिकनिहाय भाग निश्चित करून शोधमोहीम सुरू केली आहे. संबंधित मिळकतींची मोजमापे पूर्ण केली आहेत. या मिळकतींची अंतिम करआकारणी प्रक्रिया सुरू केली आहे. मिळकतधारकांकडून बांधकाम परवानगी, भोगवटा प्रमाणपत्र, भाडे करार पत्र तसेच क्षेत्रवाढीसंदर्भातील नगररचना विभागाची परवानगी मागवली आहे. कागदपत्रे सादर करण्यासाठी सात दिवसांची मुदत दिली आहे. मुदतीत कागदपत्रे न दिल्यास संबंधित मिळकत या अनधिकृत समजून शास्तीसह करआकारणी करण्यात येणार, असा इशारा प्रशासनाने दिला आहे. ज्यांची अद्याप करआकारणी झालेली नाही, अशा मिळकतधारकांनी विभागीय कार्यालयातील घरफाळा विभागाशी संपर्क साधून आवश्यक कागदपत्रे सादर करावीत, असे आवाहन आयुक्त डॉ. राजेंद्र भारूड यांनी केले आहे..
.....
सहा दिवसांतील मिळकतींचा शोध-
-करआकारणीच नसलेल्या-- २०४
-मालकाऐवजी भाडेकरूंचा वापर-- ६६
-क्षेत्र वाढवलेल्या मिळकती-- २९
......