हलकर्णीत स्वच्छता
मोहिमेला प्रतिसाद
नूल, ता. ८ ः पंचायत समिती सभापती डॉ. प्रतिभा चव्हाण यांच्या पुढाकाराने संत गजानन महाराज कॉलेज ऑफ इंजिनिअरिंगमधील विद्यार्थ्यांनी हलकर्णी ग्रामपंचायत क्षेत्रात महालक्ष्मी यात्रा झाल्यानंतर स्वच्छता मोहीम राबवून सामाजिक बांधिलकीचे दर्शन घडविले. या मोहिमेत गावातील सार्वजनिक ठिकाणे, रस्ते, शाळा परिसर तसेच इतर महत्त्वाच्या भागांची स्वच्छता करण्यात आली.
ग्रामस्थांमध्ये स्वच्छतेबाबत जनजागृती करण्यात आली. स्वच्छ, निरोगी वातावरण निर्माण करण्यास सर्वांनी सहकार्य करण्याचे आवाहन केले. विद्यार्थ्यांनी उत्साहाने सहभाग घेत गावातील विविध भागात स्वच्छतेचे काम हाती घेतले. यावेळी प्राथमिक आरोग्य केंद्रातील आरोग्य सेवक, आरोग्य सेविका, सुपरवायझर, सर्व कर्मचारी तसेच आशा सेविका यांनीही मोहिमेत सक्रिय सहभाग नोंदविला. जिल्हा परिषद सदस्य अप्पी ऊर्फ शिवशंकर हत्तरकी, ग्रामविकास अधिकारी अशोक शेळके, ग्रामपंचायत लिपिक बापू वाजंत्री, नागेश करडी यांच्यासह प्रा. राहुल देसाई, प्रा. संतोष पवार, प्रा. निकिता देसाई, विजय ढंगणावर व रवींद्र सुरनाईक, ग्रामस्थ व मंडळांचे कार्यकर्ते उपस्थित होते.