वस्त्रोद्योग फोटो
--
कापड उत्पादनात ४५ टक्के घट
इचलकरंजीत वस्त्रोद्योग संकटात ः अपेक्षित दर, मागणी नसल्याने अस्वस्थता
पंडित कोंडेकर ः सकाळ वृत्तसेवा
इचलकरंजी, ता. ९ ः शहरातील वस्त्रोद्योगासमोर एकापाठोपाठ एक अशी संकटाची मालिकाच सुरू झाली आहे. त्याचा परिणाम कापड उत्पादनावर होत आहे. सध्या सरासरी ४५ टक्के कापड उत्पादन घटले आहे. यात वेळीच सुधारणा झाली नाही तर पुढील काळात वस्त्रोद्योग कोलमडून पडण्याची भीती व्यक्त होत आहे.
अलीकडच्या काळात वस्त्रोद्योगाची घडी बसत असताना नवनवीन संकटांनी वस्त्रोद्योजक हैराण झाले आहेत. वीज सवलतीसाठी ऑनलाईन नोंदणीची अट अनेक यंत्रमागधारकांसाठी अडचणीची ठरत आहे. त्यासाठी दलालांची साखळी कार्यरत झाली आहे. तांत्रिक कारणास्तव ऑनलाईन नोंदणी झाली नाही तर वीज सवलतीला मुकण्याची भीती यंत्रमागधारकांच्या मनात आहे. दुसरीकडे सूत दरात सतत वाढ होत आहे. त्यातच वहिफणी दरवाढीमुळे यंत्रमागधारकांचे आर्थिक नियोजन बिघडत चालले आहे. कामगारांची मजुरी दरवर्षी वाढत असताना १३ वर्षे खर्चीवाले यंत्रमागधारकांची मजुरीवाढ झाली नाही. त्याचा उद्रेक पाॅवरलूम विव्हर्स असोसिएशनच्या सभागृहात झालेल्या मेळाव्यात दिसून आला.
पंचगंगा प्रदूषणाच्या आंदोलनामुळे शहरातील प्रोसेस उद्योग पूर्णतः बंद आहे. त्यामुळे कामगार वर्गात अस्वस्थता आहे. त्याचा परिणाम हळूहळू वस्त्रोद्योगावर होत चालला आहे. कापडाला अपेक्षित भाव नाही. मागणी वाढत नाही. त्यामुळे वस्त्रोद्योगातील उलाढाल ठप्प होत चालली आहे. या सर्वाचा परिणाम म्हणजे कापड उत्पादनात घट होत आहे. सध्या वस्त्रोद्योग पूर्ण क्षमतेने सुरू नाही..
--
वस्त्रोद्योगासाठी
पुढील काळ कठीण
विविध कारणांनी कापड उत्पादन कमी करण्यात येत आहे. यात प्रोसेस बंद, सूतदर वाढ आणि खर्चीवाले यंत्रमाग कारखाने बंद यामुळे कापड उत्पादनात घट झाल्याची माहिती वस्त्रोद्योगातून दिली. त्याचे गंभीर परिणाम तत्काळ जाणवणार नसले तरी पुढील काळ मात्र वस्त्रोद्योगासाठी कठीण असू शकतो, अशी भीती व्यक्त होत आहे.
--------