मिशन लक्षवेधअंतर्गत
निवड चाचणीचे आयोजन

कुस्ती, वेटलिफ्टिंग, रायफल शूटिंगसाठी चाचणी

कोल्हापूर, ता. १५ : ऑलिम्पिक स्तरावर दर्जेदार खेळाडू घडविण्यासाठी राज्य शासनाच्या ''मिशन लक्षवेध'' योजनेअंतर्गत जिल्ह्यातील क्रीडा प्रतिभा विकास केंद्रासाठी कुस्ती, वेटलिफ्टिंग आणि रायफल शूटिंग या खेळांच्या फेरनिवड चाचण्यांचे आयोजन केले आहे. योजनेतून प्रत्येक खेळासाठी २० खेळाडूंची निवड केली जाणार असून, जिल्ह्यातील जास्तीत जास्त खेळाडूंनी चाचणीत सहभाग घेण्याचे आवाहन जिल्हा क्रीडा अधिकारी विद्या शिरस यांनी केले आहे.
यापूर्वी हॉकी आणि मैदानी खेळांच्या चाचण्या पूर्ण झाल्या असून, आता उर्वरित तीन खेळांसाठी २८ आणि २९ मे रोजी या फेरचाचण्या घेतल्या जाणार आहेत. निवड झालेल्या खेळाडूंना प्रगत प्रशिक्षण, पूरक आहार, गणवेश, क्रीडा साहित्य, राष्ट्रीय व विदेशी स्पर्धा प्रवास खर्च, प्रशिक्षक मानधन, वैद्यकीय उपचार आणि विम्याचा संपूर्ण खर्च शासनातर्फे केला जाणार आहे. यासाठी खेळाडूचे वय २१ वर्षांच्या आत असावे. खेळाडूने शालेय किंवा अधिकृत संघटनांच्या राज्यस्तरीय स्पर्धेत सहभाग घेतलेला असावा किंवा पदक प्राप्त केलेले असावे. खेळाडू महाराष्ट्र राज्याचा रहिवासी असावा. गुरुवारी (ता. २८) रायफल शूटिंग छत्रपती संभाजी महाराज विभागीय क्रीडा संकुल येथे, शुक्रवारी (ता. २९) वेटलिफ्टिंग व कुस्ती छत्रपती शिवाजी स्टेडियम येथे होणार असून पात्र व इच्छुक खेळाडूंनी अर्ज, जन्म दाखला, शाळा सोडल्याचा दाखला, वैद्यकीय फिटनेस प्रमाणपत्र, आधारकार्ड, गत २ वर्षांतील क्रीडा कामगिरीचे प्रमाणपत्र आणि पासपोर्ट साईज फोटो या कागदपत्रांसह २६ मे पर्यंत जिल्हा क्रीडा अधिकारी कार्यालयाशी संपर्क साधण्याचे आवाहन केले आहे.