58746
गडहिंग्लज : नगरपरिषद व कला अकादमीतर्फे झालेल्या कार्यक्रमात किरणसिंह चव्हाम यांनी खानदानपणाची गोष्ट या कथेचे अभिवाचन केले.

साहित्य-नाट्याचा रंगला सुरेल संगम
रसिक मंत्रमुग्ध; गडहिंग्लजला अभिवाचन कार्यक्रम उत्साहात
सकाळ वृत्तसेवा
गडहिंग्लज, ता. २२ : गडहिंग्लज नगरपरिषदेच्या १३९ व्या वर्धापन दिनानिमित्त आयोजित कथा अभिवाचन कार्यक्रमाने शहराच्या सांस्कृतिक जीवनात एक भावस्पर्शी क्षण निर्माण केला. नगरपरिषद व कला अकादमीच्या संयुक्त विद्यमाने झालेल्या या उपक्रमाने शब्दांच्या पलीकडील भावविश्व, ही संकल्पना रसिकांना अनुभवता आली.
छत्रपती शिवाजी महाराज भाजी मंडईमधील कला अकादमीमध्ये झालेल्या कथेच्या अभिवाचनमध्ये सुरुवातीपासूनच कलात्मक वातावरण निर्माण झाले. योग्य ठिकाणी रसिकांनी दिलेली टाळ्यांची दाद कार्यक्रमात अधिक रंगत आणली. कथा, वाचिक अभिनय, आवाजातील चढ-उतार आणि सुरेल पार्श्वसंगीत यांचा सुंदर मिलाफ प्रेक्षकांना खिळवून ठेवला. खानदानपणाची गोष्ट या कथेने अभिवाचनाला सुरुवात झाली. किरणसिंह चव्हाण यांनी सहज, पण प्रभावी शैली व भावपूर्ण सादरीकरणामुळे ही कथा जिवंत झाली. जातीच्या अभिमानात अडकलेल्या व्यक्तीची मानसिकता आणि बदलत्या काळाशी त्याचा होणारा संघर्ष त्यांनी वास्तवदर्शी पद्धतीने उभा केल्याने प्रेक्षकांना हसण्यासोबतच विचार करायलाही भाग पाडले.
‘कल्पना विलास’ ही कथा प्रमोद पुजारी व रिया बेतम यांनी सादर केली. प्रमोद पुजारी यांच्या वाचिक अभिनयात वेगळीच ताकद जाणवत होती. त्यांच्या आवाजातील भाव, लय आणि नाट्यमयतेमुळे प्रत्येक प्रसंग डोळ्यांसमोर उभा राहत होता. रिया बेतम यांनी साध्या, सहज सादरीकरणातून कथेला हळुवार स्पर्श दिला. दोघांच्या समन्वयातून साकारलेले हे अभिवाचन रसिकांना मंत्रमुग्ध केले. कथा वाचनाला अर्जुन पिसाळ यांच्या पार्श्वसंगीताने उंची दिली. शिवाजी पाटील यांनी नाट्य चळवळीविषयी मार्गदर्शन करत अशा उपक्रमांची गरज अधोरेखित केली. बांधकाम सभापती गुंड्या पाटील यांच्याहस्ते उद्‍घाटन झाले. नाट्य चळवळ ही समाजाला दिशा देणारी शक्ती असून, अशा उपक्रमांना नगरपरिषद नेहमी पाठबळ देईल, अशी ग्वाही पाटील यांनी दिली. नगरसेवक विठ्ठल भमानगोळ, अण्णासाहेब देवगोंडा, विकास कांबळे, डॉ. मंगल मोरबाळे यांची प्रमुख उपस्थिती होती. रामय्या हिरेमठ आभार मानले.