06413

शिवराज्याभिषेक सोहळ्यात सहभागी व्हावे
संयोगिताराजे छत्रपती; ‘रायगडची गाथा’ लघुपटाचे प्रदर्शन

सकाळ वृत्तसेवा
कोल्हापूर, ता. ६ : सहा जूनला होणाऱ्या शिवराज्याभिषेक सोहळ्यात शिवभक्तांनी सहभागी व्हावे, असे आवाहन युवराज्ञी संयोगिताराजे छत्रपती यांनी आज येथे केले.
शाहीर विशारद डॉ. आझाद नायकवडी निर्मित ‘रायगडची गाथा’ लघुपटाच्या प्रदर्शनाप्रसंगी त्या बोलत होत्या. रिलायन्स मॉलमध्ये कार्यक्रम झाला.
संयोगिताराजे म्हणाल्या, ‘‘छत्रपती घराण्याची सून म्हणून मी शिवछत्रपतींच्या विचारांचा व कार्याचा वारसा पुढे चालवत नाही. मुळातच मी शिवभक्त असून, त्याचे श्रेय संभाजीराजेंना जाते. आयुष्यातील प्रसंगांना सामोरे जाण्याचे बळ मला शिवचरित्रातून मिळाले आहे. यंदा शिवराज्याभिषेकास ३५० वे वर्ष सुरू होत असून, वैविध्यपूर्ण उपक्रमांनी तो साजरा केला जाणार आहे. शिवभक्तांनी त्यात सहभागी होऊन ऐतिहासिक क्षणाचे साक्षीदार व्हावे.’’
अखिल भारतीय शिवराज्याभिषेक समितीचे अध्यक्ष फत्तेसिंह सावंत म्हणाले, ‘‘शिवराज्याभिषेक सोहळा लोकोत्सव झाला आहे. यंदा चार लाख शिवभक्त गडावर येतील, असा अंदाज आहे. त्यादृष्टीने जय्यत तयारी केली आहे.’’
दुर्ग अभ्यासक डॉ. अमर अडके यांनी डॉ. नायकवडी लिखित गडावरील गीत स्थळ व घटनांचे योग्य वर्णन करणारे असल्याचे सांगितले. डॉ. मनीषा नायकवडी, रमेश पाळेकर, प्रथमेश पाळेकर, प्रा. विनय पाटील, अमर वाईंगडे, ओंकार सुतार, युवराज पुजारी, रोहित भारती, केदार लोहार, मनीषा नायकवडी, अमोल पाटणकर, तुषार भोसले, कैवल्य पाटील,‌ सचिन लोकरे, शशिन कुंभोजकर, हणमंत चौगले, रूपा क्षारबिद्रे यांचा सत्कार झाला.
‌