नऊ टक्के कर आकारणी अमान्य
सावगावे, आवळे; कुरुंदवाडची चतुर्थ वार्षिक कर आकारणी
कुरुंदवाड, ता. १९ ः शहराची चतुर्थ वार्षिक कर आकारणी पाच टक्के व्हावी यासाठी जिल्हाधिकारी राहुल रेखावार यांच्याकडे लोकप्रतिनिधींच्या माध्यमातून मागणी केली होती. जिल्हाधिकाऱ्यांनी योग्य तोडगा काढू, असे आश्वासन दिले होते. मात्र, पालिका प्रशासनाने ९ टक्के कर आकारणीची घोषणा केली. ती आम्हाला अमान्य असून लोकप्रतिनिधींसह जिल्हाधिकाऱ्यांशी पुन्हा बैठक घेऊन विभागीय आयुक्तांकडे अपील करणार असल्याची माहिती शिवसेना (ठाकरे गट) शहरप्रमुख बाबासाहेब सावगावे व राजू आवळे यांनी दिली.
श्री. सावगावे म्हणाले, ‘घरफाळा माफ व्हावा यासाठी शिवसेना आणि कृती समितीच्या माध्यमातून ऑक्टोबर २०२२ पासून पाठपुरावा करत आंदोलने केली आहेत. आमदार-खासदारांची शिष्टाई करत जिल्हाधिकारी रेखावार यांच्याशी झालेल्या बैठकीत ५ टक्के कर आकारणी करावी, अशी चर्चा झाली होती. अनुदान स्वरूपात एक कोटी रुपये आमदार आणि खासदारांनी देण्याचे आश्वासन दिले आहे. करवाढ ५ टक्के असावी, अशी आमची मागणी आहे. याबाबत योग्य तोडगा काढू, असे जिल्हाधिकाऱ्यांनी सांगितले होते. मात्र, पालिका प्रशासनाने ९ टक्के कर आकारणीची घोषणा करून अन्याय केला आहे. शहराची कर आकारणी ५ टक्केच करावी. यासाठी शिवसेना आणि कृती समितीच्या माध्यमातून व्यापक लढा उभारणार आहे.’ वैभव उगळे, दयानंद मालवेकर, आप्पासाहेब भोसले, राजेंद्र बेले, बबलू पवार आदी उपस्थित होते.
----------
शिवसेना ठाकरे गट आक्रमक
शहरप्रमुख सावगावे आणि आवळे यांनी शिष्टमंडळाने मुख्याधिकारी आशिष चौहान यांची भेट घेऊन जिल्हाधिकाऱ्यांच्याकडे ५ टक्के कर आकारणी करण्याची मागणी केली होती. योग्य तोडगा काढू, असे आश्वासन दिले असताना ९ टक्के कर आकारणीची घोषणा कशी केली अशी विचारणा केली असता त्रिसदस्यीय समितीला असलेल्या अधिकाराने केल्याचे सांगितले. हा निर्णय आम्हाला अमान्य असल्याचे सांगत श्री. सावगावे व आवळे आक्रमक झाले.