हेरवाडला जयंतीनिमित्त
मिरवणूक, मूर्तीची प्रतिष्ठापना
कुरुंदवाड, ता. २३ ः भगवान गौतम बुद्धांनी जगाला शांतीचा संदेश दिला असून प्रज्ञा शील करुणा या त्रिसूत्रीचा प्रत्येकाने अवलंब केला पाहिजे. जगाला सध्या युद्धाची नाही, तर बुद्धांच्या विचारांची गरज आहे, असे प्रतिपादन माजी खासदार राजू शेट्टी यांनी हेरवाड येथे केले.
हेरवाड (ता. शिरोळ) येथे डॉ. बाबासाहेब आंबेडकर व भगवान गौतम बुद्ध मूर्ती प्रतिष्ठापना समितीतर्फे बुद्ध जयंतीनिमित्त मिरवणूक व गौतम बुद्ध मूर्ती प्रतिष्ठापना कार्यक्रमाप्रसंगी ते बोलत होते.
सकाळी गावातील प्रमुख मार्गावरून मिरवणूक काढण्यात आली. यानंतर माळभाग येथे ध्वजवंदन व मूर्तीचे पूजन राजू शेट्टी व दत्त उद्योग समूहाचे अध्यक्ष गणपतराव पाटील यांच्या हस्ते झाले. गौतम बुद्ध यांच्या मूर्तीची प्रतिष्ठापना झाली. यावेळी समाजातील गुणवंत विद्यार्थ्यांचा सत्कार झाला. गणपतराव पाटील म्हणाले, ‘भगवान गौतम बुद्धांचे आचार - विचार सर्वांनी जोपासणे गरजेचे आहे.’ दलितमित्र अशोकराव माने, सरपंच रेखा जाधव, दिलीप पाटील, वसंतराव देसाई, माजी पंचायत समिती सभापती सुवर्णा अपराज, माजी सरपंच सूरगोंडा पाटील, राजू आवळे, सचिन पाटील आदी उपस्थित होते.