कोतोलीची हनुमान यात्रा उत्साहात
माजगाव, ता. २९ : कोतोली (ता. पन्हाळा) येथील श्री हनुमान चैत्र यात्रा अक्षयतृतीयेनंतर येणाऱ्या शनिवारी प्रथेनुसार भरते. यावर्षी यात्रा मोठ्या उत्साहात झाली. मुख्य पुजारी रामानंद गुरव यांनी ग्रामदैवत हनुमानाला पहाटे दुग्धाभिषेक घालून साज-शृंगार करून सालंकृत रूपात खडी पूजा बांधली होती. सरपंच वनिता पाटील, उपसरपंच सुवर्णा पाटील, ग्रा.पं. पदाधिकारी तसेच ज्येष्ठ नेते डी. जी. पाटील, बळवंत पाटील तसेच शंकर पाटील, आर. एस. पाटील, प्रशांत पाटील, सज्जन पाटील, सागर वरपे, विश्वास पाटील, राज गंधवाले, बाबासो साळोखे यांच्या उपस्थितीत महाआरती करून यात्रेला सुरूवात झाली. शेकडो भक्तांनी मंदिरात जाऊन हनुमानाचे दर्शन घेतले. सायंकाळी वाजतगाजत सासनकाठी मिरवणूक व पालखी सोहळा झाला. रात्री लावण्यांचा बहारदार कार्यक्रम पाहण्यासाठी शौकिनांनी गर्दी केली होती. रविवारी (ता. ३०) जेवणावळीनंतर यात्रेचा समारोप होईल.
दीड लाखाच्या कुस्तीचे आकर्षण
कोतोलीला कुस्तीची मोठी परंपरा आहे. दरवर्षी यात्रेला जंगी कुस्ती मैदान भरते. बांधकाम व्यावसायिक सोपान डी. पाटील यांनी आयोजित केलेली दीड लाखाची कुस्ती यंदा लक्षवेधी ठरेल. महाराष्र्ट नागरी, विश्वास पतसंस्था, सुवर्णबल्ली पत. तसेच जनसेवा पतसंस्थेतर्फे प्रमुख कुस्त्या आयोजित केल्या आहेत.