04450

धोकादायक ऊस वाहतूक अपघातास निमंत्रण

ट्रॅक्टरचालक बेशिस्तच; कडक कारवाई करण्याची मागणी

सकाळ वृत्तसेवा

माजगाव, ता. ११ ः कारखान्यांचा गाळप हंगाम सुरू झाल्यावर धोकादायक ऊस वाहतुकीचा प्रश्न दरवर्षी ऐरणीवर येतो. यंदाही ऊसवाहतूक धोकादायक व मर्यादा ओलांडून होत असल्याचे चित्र आहे. धोकादायक वाहतुकीवर निर्बंध घालण्याची गरज आहे.
सध्या ऊस गाळप हंगामाला वेग आला आहे. हंगाम संपेपर्यंत रात्रंदिवस अनेक ट्रक, ट्रॅक्टर व बैलगाडीने वाहतूक सुरू असते. मर्यादेपेक्षा अधिक ऊस वाहतूक अपघाताला निमंत्रण ठरते. विशेषतः ट्रॅक्टरमधून क्षमतेपेक्षा अधिक ऊस वाहतूक होते. पाठीमागे अथवा बाजूला रिफ्लेक्टर, रेडियम व टेल लॅम्प नसल्याने वाहनधारकांना केवळ ट्रॅक्टर दिसतो. त्यामागील ट्रॉलीचा अंदाज येत नाही. वजन मर्यादा, रिफ्लेक्टर बसविणे यासह कोणत्याच वाहतूक नियमांचे पालन होताना दिसत नाही. गतवर्षी उपप्रादेशिक परिवहन विभाग व वाहतूक पोलिसांनी केलेल्या जागृतीमुळे अपघातावर नियंत्रण आले. त्यानंतरही यंदा ऊस वाहतुकीच्या ट्रॅक्टरमालक आणि चालकांना शिस्तीचे वावडे असल्याचेच चित्र आहे. मर्यादेपेक्षा ऊस जास्त भरला जातो. रस्ता लेव्हल नसेल तर ट्रॅक्टर हेलकावे खातो. ओव्हरटेक करतांना वाहनधारकांना जीव मुठीत धरून प्रवास करावा लागतो.

चौकट
क्षमतेपेक्षा जास्त ऊस धोकादायक.....
ट्रॅक्टर ट्रॉलीमध्ये मर्यादेपेक्षा अधिक ऊस भरला जातो. दोरखंड निघून उसाच्या मोळ्या लोंबत असतात. ऊस खाली पडत असतो. ऊस मोळ्या वाहनधारकांना लागून दुर्घटना घडतात. रस्त्यावर पडलेल्या उसामुळेही दुचाकी घसरतात.

साउंड बॉक्समुळे त्रास....
ऊस वाहतुकीच्या ट्रॅक्टरमध्ये साउंड बॉक्सवर जोरजोरात गाणी वाजवली जातात. मागून वाहन आलेले चालकाला काही समजत नाही. साउंडचा ज्येष्ठ नागरिक, बालकांना त्रास होतो. यावरून चालकाला जाब विचारला तर वादाचे प्रसंग उद्भवतात.

प्रतिक्रिया
बसपाळीमुळे आठवड्यातून फक्त ४ ते ५ खेपा होतात. कामगार ॲडव्हान्स, ड्रायव्हर पगार , डिझेल खर्च वजा करता जास्त फायदा होत नाही. त्यामुळे जास्तीत जास्त ऊस ट्रॉलीमध्ये भरतो.
- गणपती पाटील, ट्रॅक्टरचालक, माजगाव