दीपक हंडे 02752 (पांढरा शर्ट)
सुभाष हंडे 02750 (गळ्यात स्कार्प)
संदीप हंडे 02751

शाहूवाडीत चाकू हल्ल्यात तिघे गंभीर
चारचाकीचा धक्का लागल्यानंतर बाचाबाची; तीन जण ताब्यात

सकाळ वृत्तसेवा
शाहूवाडी, ता. १५ ः चारचाकीचा धक्का लागल्यानंतर झालेल्या बाचाबाचीत चाकू हल्ला झाल्याने तीन सख्खे भाऊ गंभीर जखमी झाले. दीपक सर्जेराव हंडे, सुभाष सर्जेराव हंडे व संदीप सर्जेराव हंडे (सर्व रा. सुपात्रे) अशी जखमींची नावे आहेत. आज सकाळी साडेआठच्या सुमारास बांबवडे येथील पोलिस चौकीसमोर घटना घडली. या प्रकरणी प्रवीण जानकर, विशाल जाणकर व गुंगा जाणकर (सर्व रा. बांबवडे) यांना पोलिसांनी ताब्यात घेतले.
पोलिसांकडून मिळालेली माहिती अशी, दीपक हंडे हा शासकीय गाडीवर चालक आहे. तो गाडी आणण्यासाठी निघाला असता बांबवडे येथे पोलिस चौकीसमोर थांबला होता. त्यावेळी खासगी प्रवासी वाहतूक करणारा प्रवीण जानकर गाडी वळवत असताना दीपक यांना गाडीचा धक्का लागला. त्यावरून दीपक व प्रवीण यांच्यात बाचाबाची झाली. त्यात प्रवीण याने चिडून दीपकवर चाकू हल्ला केला. त्यात दीपकच्या पोटावर व हातावर वार झाल्याने तो गंभीर जखमी झाला. बाचाबाची व चाकू हल्ला झाल्याचे समजताच दीपकचे भाऊ सुभाष व संदीप हंडे व प्रवीणचा भाऊ विशाल व वडील गुंगा जानकर तेथे आले. त्यावेळी झालेल्या मारामारीत सुभाष व संदीप हंडे जखमी झाले. सुभाषला डोक्यात तर संदीपला नाकावर मार लागला. विशाल व गुंगा जानकर हेही जखमी झाले.
दीपक, सुभाष व संदीप हंडे या तिघांवर बांबवडे येथील प्राथमिक आरोग्य केंद्रात प्राथमिक उपचार करून त्यांना पुढील उपचारसाठी कोल्हापुरला पाठवले, तर विशाल व गुंगा जानकर यांच्यावर मलकापूर ग्रामीण रुग्णालयात प्राथमिक उपचार करण्यात आले. बांबवडे पोलिस चौकी व बस थांबा परिसरात गर्दीच्या ठिकाणीच घटना घडल्याने नागरिकांनी मोठी गर्दी केली होती. शाहूवाडी पोलिसांत घटनेची नोंद झाली असून, पोलिस निरीक्षक विजय घेरडे तपास करत आहेत.