मुरगूडमध्ये ज्येष्ठांची
मतदान जनजागृती फेरी

मुरगूड, ता. १७ : येथील मुरगूड शहर ज्येष्ठ नागरिक संघ, निसर्ग वेध प्रतिष्ठान व समाजवादी प्रबोधिनी शाखा मुरगूड यांच्या संयुक्त विद्यमाने विधानसभा निवडणुकीसाठी मतदारांचे प्रबोधन करण्यासाठी प्रचार फेरी काढण्यात आली.
यावेळी संचालक जयवंत हावळ यांनी प्रचार फेरीचा उद्देश सांगितला. प्रचार फेरी हुतात्मा तुकाराम चौक ते मुरगूड नाका क्रमांक एकपर्यंत काढण्यात आली. मतदार प्रबोधनाच्या दृष्टीने निर्भयपणे शंभर टक्के मतदान करा, अशा अनेक घोषणा देण्यात आल्या. सर पिराजी रोडमार्गे मुरगूड एसटी बसस्थानकामध्ये फेरीची सांगता करण्यात आली. त्यावेळी संघाचे पदाधिकारी व सदस्य मोठ्या संख्येने उपस्थित होते. किशोर पाटील यांनी आभार मानले.