5224
मुरगूड : कुरुकली (ता. कागल) येथील केलेले गटरचे काम.
...............
कुरुकलीत गटार काम निकृष्ट
झाल्याने नागरिकांत नाराजी

मुरगूड, ता. १८ : कुरुकली (ता. कागल) येथे प्राथमिक शाळेच्या पाठीमागे असलेल्या गटारीचे काम निकृष्ट पद्धतीने झाल्याने नागरिकांतून नाराजी व्यक्त होत आहे. संबंधितांनी याकडे लक्ष देऊन काम दर्जेदार करावे, अशी मागणी होत आहे.
सध्या कुरुकलीत विविध ठिकाणी रस्ते, गटर्स व नळपाणी योजनेची कामे सुरू आहेत. आठवड्यापूर्वीच प्राथमिक शाळेच्या मागे असणाऱ्या गटरचे काम केले आहे. येथे २५ वर्षांपूर्वी दगडी गटर बांधली होती. कालांतराने या गटारीतील पाणी शाळेत पाझरू लागले. तक्रार करूनही ग्रामपंचायत प्रशासनाने याकडे दुर्लक्ष केले. शेवटी शाळा दुरुस्ती निधीतून शाळेतील फरशी बदलण्यात आली. यावर्षी विविध निधीतून कोट्यवधीचा निधी गावच्या विकासासाठी मिळाला आहे. मात्र, सध्या गावात सुरू असलेली कामे दर्जाहीन आहेत. ठेकेदाराला निव्वळ पोसण्याचे काम सुरु असल्याची ग्रामस्थांची तक्रार आहे. याबाबत संबंधित विभागाकडे तक्रारी करून ही त्याकडे दुर्लक्ष केले जात आहे.
प्राथमिक शाळेच्या मागे असलेल्या गटारीच्या काम ठेकेदाराने घाईगडबडीत उरकले आहे. त्यामुळे गटारीत पुन्हा पाणी तुंबून राहणार आहे. परिसरातील नागरिकांची आरसीसी गटर बांधण्याची मागणी असताना ती धुडकावून यू टाईप गटर बांधले आहे. त्यामुळे पुन्हा समस्या निर्माण होणार आहेत. याला जबाबदार कोण? असा सवाल उपस्थित होत आहे.