चोरट्याकडून तीन मोटारसायकली जप्त

नागाव, ता. १९ : मोटारसायकल चोरट्यास अटक करून त्याच्याकडून तीन मोटारसायकली जप्त करण्यात आल्या. निलेश तानाजी देसाई ( वय २३, रा. चिखली, ता. शिराळा, जि. सांगली ) असे त्याचे नाव आहे. शिरोली एमआयडीसी पोलिसांनी शिरोली औद्योगिक वसाहतीमधील परमार पेट्रोल पंप येथील रस्त्यावर ही कारवाई केली.
याबाबत पोलिसांकडून मिळालेली माहिती अशी , जिल्हा पोलिस अधीक्षक शैलेश बलकवडे यांच्या आदेशानुसार औद्योगिक वसाहतीमधील परमार पेट्रोल पंप येथील रस्त्यावर पोलिसांची नाकाबंदी होती. नाकाबंदीच्या वेळी नंबर प्लेट नसणारी मोटारसायकल घेऊन निलेश देसाई तेथे आला. मोटारसायकलला नंबर प्लेट का नाही याची चौकशी पोलिसांनी केली. तसेच मोटरसायकलच्या कागदपत्रांची मागणी केली. मात्र देसाई याच्याकडून मिळालेली उत्तरे समाधानकारक नसल्याने पोलिसांनी सखोल चौकशी केली. यामध्ये ही मोटरसायकल चोरीची असल्याचे निष्पन्न झाले. अधिक चौकशी केली असता आणखी दोन मोटरसायकल चोरल्याची कबुली देसाई याने दिली. कोल्हापूर येथील शाहूपुरी व लक्ष्मीपुरी, तसेच सांगली जिल्ह्यातील इस्लामपूर शहर पोलिस ठाणे परिसरातून आपण मोटरसायकली चोरल्याचे देसाई याने शिरोली एमआयडीसी पोलिसांना सांगितले. मिळालेल्या माहितीनुसार संबंधित पोलिस ठाण्यात चौकशी केली असता तेथील गुन्हे रजिस्टरला मोटरसायकल चोरीचे हे गुन्हे दाखल असल्याचे समजले. त्यानुसार शिरोली एमआयडीसी पोलिसांनी निलेश देसाई याला ताब्यात घेऊन त्याच्याकडून चोरीच्या तीन मोटारसायकली जप्त केल्या.
सहायक पोलिस निरीक्षक सागर पाटील यांच्या मार्गदर्शनाखाली सतिश जंगम, नजीर शेख, महेश अंबी, सचिन परीट, सुरेश कांबळे, सचिन पाटील यांनी ही कारवाई केली.