02979

मंगल अक्षता कलशाचे शियेत स्वागत
शिये : शिये (ता. करवीर) येथे अयोध्येतील राममंदिर मंगल अक्षता कलशाचा पालखी सोहळा भक्तिमय वातावरणात झाला. अयोध्यातून रामलल्ला प्रतिष्ठापना व कलशारोहण सोहळ्याचे निमंत्रण देण्यासाठी मंगल अक्षता कलशाचे गुरुवारी सायंकाळी शियेत आगमन झाले. प्रभू रामचंद्र प्रतिमा व मंगल कलशाचे सरपंच शीतल मगदूम, कारसेवक निवास पाटील व शिवाजी बुवा यांनी पूजन केले. टाळ-मृदंगाच्या गजरात अक्षता कलशाची पालखी निघाली. पालखी मार्गावर रांगोळी काढली होती. रस्त्याच्या दुतर्फा ग्रामस्थांनी फुलांचा वर्षाव करत दर्शन घेतले. मंगलकलश पालखी हनुमाननगर, श्री रामनगर, शिवाजीनगर, विठ्ठलनगर, माळवाडी परिसरातून प्रदक्षिणा घालत गावभागात पोचली. पालखी सोहळा गावात आल्यानंतर करवीर तालुका संघचालक शशिकांत पाटील यांच्याहस्ते छत्रपती शिवाजी महाराजांच्या पुतळ्याला पुष्पहार घालण्यात आला. पाच तास चाललेल्या पालखी सोहळ्याची सांगता ग्रामदैवत हनुमान मंदिरात महाआरतीने झाली.