03281

करीम जमादारचे राज्यसेवा परीक्षेत यश
नानीबाई चिखली ः महाराष्ट्र लोकसेवा आयोगामार्फत घेतलेल्या परीक्षेत करीम इम्तियाज जमादार याने नेत्रदीपक यश मिळविले. त्याची अर्थ मंत्रालय अंतर्गत वस्तू व सेवा कर विभागात कर सहाय्यक पदावर निवड झाली. करीम बृहन्मुंबई महापालिकेत कार्यकारी सहाय्यक पदावर सध्या कार्यरत आहे.
वडील इम्तियाज जमादार शेती करतात. आईने शिवणकाम करत कुटुंबाला हातभार लावताना करीमला उच्च शिक्षण घेण्यास व स्पर्धा परीक्षा करण्यास पाठबळ दिले. करीमचे प्राथमिक शिक्षण जिल्हा परिषदेच्या कुमार विद्यामंदिर शाळेत तर व चिखली हायस्कूलमध्ये माध्यमिक शिक्षण झाले. देवचंद कॉलेजमध्ये शास्त्र शाखेची पदवी घेतली. शिवाजी विद्यापीठाच्या रसायनशास्त्र विभागातून पदव्युत्तर शिक्षण व बी.एड. कागलमध्ये पूर्ण केले. स्पर्धा परीक्षेत सातत्यपूर्ण प्रयत्न, चुकातून शिकत सकारात्मक मनोवृत्ती ठेवली तर निश्चितच यश मिळते; अशी प्रतिक्रिया त्याने दिली. आई-वडिलांची साथ, कठीण परिस्थितीतही उभं राहण्याची शिकवण मला बळ देत गेली, असे त्याने सांगितले.