00989
चित्रा सुतार
------
नृसिंहवाडी सरपंचपदी चित्रा सुतार
सकाळ वृत्तसेवा
नृसिंहवाडी ता. ५ : येथील ग्रामपंचायतीच्या कार्यालयात सरपंच निवडीसाठी झालेल्या बैठकीत चित्रा सुतार यांचा एकमेव अर्ज आल्याने त्यांची सरपंचपदी बिनविरोध निवड केली. निवडीच्या अध्यक्षस्थानी मंडल अधिकारी अमित पडळकर होते. यावेळी दत्तगुरू ग्रामविकास आघाडीच्या कार्यकर्त्यांनी गुलालाच्या उधळणीत जल्लोष करत गावात विजयी मिरवणूक काढली.
मिरवणुकीनंतर सरपंच चित्रा सुतार व समर्थकांनी श्री दत्त मंदिरात दत्त दर्शन घेतले. निवडीनंतर झालेल्या कार्यक्रमात जिल्हा परिषदेच्‍या माजी सदस्या धनश्री जगदाळे, पंचायत समितीच्‍या माजी सभापती अर्चना धनवडे यांनी चित्रा सुतार यांचा सत्कार केला. यावेळी सौ. सुतार म्हणाल्या, ‘गावाच्या सर्वांगीण विकासासाठी मी कार्यरत असणार आहे. गेल्या तीन वर्षांत रेंगाळलेले प्रश्न आम्ही अग्रक्रमाने सोडवणार आहोत.’ दत्तगुरू आघाडीचे प्रमुख धनाजीराव जगदाळे, माजी उपसरपंच अनंत धनवडे, मराठा नेते सागर धनवडे यांनी मनोगत व्यक्त केले. ग्रामसेवक बी. एन. टोणे, उपसरपंच रमेश मोरे, सदस्य चेतन गवळी, अनघा पुजारी, आदी उपस्थित होते.
----------------
सत्तासंघर्षाची निर्णायक अखेर
तीन वर्षांपासून सुरू असणाऱ्या सत्ता संघर्षाची आज निर्णायक अखेर झाली. रमेश सुतार व चेतन गवळी यांच्या तक्रारीमुळे तत्कालीन सरपंच पार्वती कुंभार यांना पदावरून पायउतार व्हावे लागले होते. त्यांच्या रिक्त जागेवर चित्रा सुतार यांची बिनविरोध वर्णी लागली. आज झालेल्या सरपंच निवडीच्या बैठकीस विरोधी दत्तराज आघाडीचे सदस्य अनुपस्थित होते.