02405
जोतिबा, पोहाळे परिसरात
पिकांची समाधानकारक उगवण
जोतिबा डोंगर, ता. ८ ः पन्हाळा तालुक्यातील जोतिबा डोंगर, पोहाळे, गिरोली, कुशिरे परिसरात भात, भुईमूग, सोयाबीन ज्वारी पिकांच्या पेरण्या पूर्ण झाल्या आहेत . सध्या परिसरात हलक्याच स्वरूपाचा पाऊस पडत असल्याने पिकांची उगवण समाधानकारक झाली आहे.
भागात पावसाचा जोर नसल्यामुळे ओढे-नाले कोरडेच आहेत. या भागात दरवर्षी ७ जूननंतर पेरण्या होतात. यंदा एखादाही वळीव पाऊस पडला नाही. परिणामी ट्रॅक्टरच्या साहाय्याने रानांच्या नांगरटी व मशागती शेतकऱ्यांना पूर्ण कराव्या लागल्या. पाऊस नसल्याने माळरानातील ऊस पिके पूर्णपणे करपलीत . शेतकऱ्यांना यंदा मोठा फटका बसणार आहे . २० जूननंतर मात्र परिसरात हलका पाऊस पडण्यास सुरुवात झाली. परिसरात २५ जूनपासून पेरण्यांना प्रारंभ झाला. त्यानंतर या हलक्या पडणाऱ्या पावसातच या पिकांच्या पेरण्या पूर्ण झाल्या. पिकांना रासायनिक खते देण्याचे काम युद्धपातळीवर सुरू असून मोठ्या पावसाची प्रतीक्षा आहे