02609
जोतिबा मंदिर रोषणाईने उजळले
आजपासून नवरात्रोत्सव ः प्रशासन यंत्रणेसह सज्ज

सकाळ वृत्तसेवा

जोतिबा डोंगर, ता. १४ ः येथील श्री क्षेत्र जोतिबा मंदिरात रविवार (ता. १५) पासून शारदीय नवरात्र उत्सवाला प्रारंभ होणार असून सर्व यंत्रणा सज्ज ठेवली आहे. सोहळ्याची तयारी पूर्ण झाली असून मंदिरात विद्युतरोषणाई केल्यामुळे जोतिबा मंदिर व परिसर उजळून निघाला आहे. डोळे दीपवणाऱ्या रोषणाईमुळे मंदिराला वेगळीच शोभा आली आहे.
रविवारी सकाळी मुख्य मंदिरात सनई, तुतारी, ढोल वाद्यांच्या गजरात घटस्थापनेचा विधी होईल. त्यानंतर यमाई, तुकाई, भावकाई मंदिरांत पारंपरिक पद्धतीने घटस्थापनाचा विधी होईल. रविवार असल्यामुळे पहिल्याच दिवसापासून डोंगरावर गर्दी होईल. यासाठी कोडोली पोलिस ठाण्याचे सहाय्यक पोलिस निरीक्षक शीतलकुमार डोईजड यांनी यंत्रणा सज्ज ठेवली असून देवस्थान समितीनेही जादा गार्ड मागविले आहेत. देवस्थान समितीने दर्शन मंडपातून दर्शन रागांचे नियोजनही केले आहे. ग्रामपंचायतीने पिण्याची पाण्याची सोय, स्वच्छताही केली आहे. डोंगरावरील नवरात्र उत्सव सोहळ्यास पारंपरिक महत्त्व असून हा सण पुजारी, ग्रामस्थ मोठ्या प्रमाणावर साजरा करतात. शनिवारी (ता. २१) जोतिबा देवाचा जागर सोहळा होणार असून या दिवशी मंदिर रात्रभर खुले राहील. नऊ दिवस डोंगरावर गर्दी होईल; त्या दृष्टीने नियोजन केले आहे.