जिल्हांतर्गत शिक्षक बदली
प्रक्रिया तातडीने सुरू करा

पुरोगामी संघटनेचे ग्रामविकास विभागास निवेदन

सकाळ वृत्तसेवा
फुलेवाडी, ता. २१ ः महाराष्ट्र राज्यातील लोकसभा निवडणुकीचे सर्व टप्पे संपल्याने राज्यातील आचारसंहिता शिथिल करून जिल्हांतर्गत शिक्षक बदली प्रक्रिया सुरू करण्याचे निर्देश सर्व जिल्हा परिषदांना द्यावेत, या मागणीचे निवेदन महाराष्ट्र पुरोगामी प्राथमिक शिक्षक संघटनेने नुकतेच ग्रामविकास विभागाचे सचिव एकनाथ डवले यांना दिले.
११ मार्च २०२४ च्या शासन पत्रानुसार नवीन नियुक्तीपूर्वी शिक्षकांच्या जिल्हांतर्गत बदल्या करण्याबतचे निर्देश सर्व जिल्हा प्रशासनास दिले होते. दरम्यान, लोकसभा निवडणूक आचारसंहिता सुरू झाल्याने जिल्हांतर्गत शिक्षक बदली प्रक्रिया थांबली होती. राज्यातील लोकसभा निवडणुकीचे सर्व टप्पे आता संपल्याने महाराष्ट्र राज्यातील आचारसंहिता शिथिल झाली आहे. त्यामुळे राज्यातील जिल्हांतर्गत बदली प्रक्रिया सुरू करण्याचे निर्देश जिल्हा परिषदांना द्यावेत, अशी मागणी केली आहे.
निवेदनावर संघटनेचे राज्य नेते विजय भोगेकर, राज्याध्यक्ष प्रसाद पाटील, राज्य सरचिटणीस हरिश ससनकर, महिला राज्याध्यक्षा अलका ठाकरे, महिला राज्य सरचिटणीस शारदा वाडकर आदींच्या सह्या आहेत.