शिक्षण विस्तार अधिकारी पदे
पदोन्नतीने भरण्याची मागणी
पुरोगामी संघटनेचे शिक्षण आयुक्तांना निवेदन
सकाळ वृत्तसेवा
फुलेवाडी, ता. ६ : शासनच्या निर्देशानुसार अनेक वर्षे रिक्त असलेली श्रेणी ३, वर्ग २ ची पदे पात्र शिक्षकांमधून पदोन्नतीने भरावीत, तसेच श्रेणी ३ वर्ग ३ ची पदे पूर्वीप्रमाणे विनाअट शिक्षकांमधून पदोन्नतीने भरावीत, अशी मागणी महाराष्ट्र पुरोगामी प्राथमिक शिक्षक संघटनेने राज्याचे शिक्षण आयुक्त सूरज मांढरे व प्राथमिक शिक्षण संचालक शरद गोसावी यांच्याकडे निवेदनाद्वारे केली.
निवेदनात म्हटले आहे, राज्यातील प्राथमिक शिक्षण विभागाकडे शिक्षकांच्या प्रमाणात शिक्षकांमधून श्रेणी ३ वर्ग २ व श्रेणी ३ वर्ग ३ ची शिक्षण विस्तार अधिकारी पदे मंजूर आहेत, मात्र पदे मंजूर झाल्यापासून श्रेणी ३ वर्ग २ ची पदोन्नतीने भरावयाची पदे रिक्तच आहेत. या पदांवर पदोन्नती कधीच झालेली नाही. फक्त श्रेणी ३ वर्ग ३ ची पदे विनाअट पदोन्नतीने भरली जात होती.
कोल्हापूर जिल्ह्यात प्राथमिक शिक्षण विभागाकडे श्रेणी ३ वर्ग २ मधून पदोन्नतीची १२ पदे मंजूर असून, त्यापैकी अद्याप एकही पद भरलेले नाही. तसेच श्रेणी ३ वर्ग ३ मधून पदोन्नतीची १९ पदे मंजूर असून, पैकी ९ कार्यरत असून १० पदे रिक्त आहेत. याबाबत कार्यवाही व्हावी.
निवेदनावर राज्य नेते विजय भोगेकर, राज्याध्यक्ष प्रसाद पाटील, सरचिटणीस हरिश ससनकर, महिला राज्याध्यक्षा अलका ठाकरे, सरचिटणीस शारदा वाडकर, शंकर पवार, जिल्हाध्यक्ष एस. के. पाटील, सरचिटणीस तुषार पाटील आदींच्या स्वाक्षऱ्या आहेत.