02709

मसाईदेवी यात्रेची
ींपोर्ले तर्फ ठाणेत तयारी
पोर्ले तर्फ ठाणे ता. २८ : येथील जागृत ग्रामदैवत श्री मसाईदेवीची यात्रा गुढीपाडव्यानिमित्त रविवारी (ता. ३०) होत आहे. या पार्श्वभूमीवर पोर्लेतील ग्रामस्थांनी व ग्रामपंचायतीच्या वतीने जय्यत तयारी सुरू झाली आहे. छत्रपती शिवाजी महाराज यांच्या पदस्पर्शाने पावन झालेल्या पन्हाळ्याच्या पायथ्याशी कासारी नदीच्या काठावर वसलेले गाव म्हणजे पोर्ले तर्फ ठाणे. महिषासुरमर्दिनीच्या रुपात देवीने पौरासुराचा वध येथेच केला. म्हणून या गावाला पोर्ले तर्फ ठाणे असे ओळखले जाते. प्राचीन काळी महिषासुरमर्दिनी शब्दाचा अपभ्रंश होऊन ''मसाई'' असे नाव पडल्याची अख्यायिका आहे. चैत्रातील प्रतिपदेला ग्रामदैवत मसाईदेवीची येथील गुरव समाजाकडून पूजा बांधली जाते. यात्रेनिमित्त संध्याकाळी शेवाळे, काशीद, चेचर, साळोखे, चौगुले, खवरे, घाटगे-पाटील, भागोजी बुवा माळ,हरिहर पाणी पुरवठा यांचे सजवलेले गाडे, बैलजोड्या व देवीची पालखी मंदिरापर्यंत नेली जातात. यात्रा पन्हाळा तालुक्यात मोठी असल्याने नामवंत बैलजोड्या यात्रेत पहायला मिळतात. ग्रामपंचायतीकडूनही काही मंडळात बैलगाडी, घोडागाडी शर्यतीसह मनोरंजनाचे कार्यक्रम होतात. दुसऱ्या दिवशी जंगी कुस्ती मैदान असते. यात्रेत खेळणी, पाळणे, विविध वस्तूंचे दुकाने लावली जातात. यात्रेनिमित्त लाखो रुपयांची उलाढाल होते.