‘पिंपळवाडी सिंचन योजना राबवा’
शाहूनगर ः पिंपळवाडी (ता. राधानगरी) येथे कोरडवाहू शेतीसाठी सिंचन योजना राबवावी; या मागणीचे निवेदन आमदार प्रकाश आबिटकर यांना दिले. निवेदनात म्हटले आहे, पिंपळवाडी राधानगरी तालुक्यातील डोंगरमाथ्यावरील छाेटी वाडी आहे. वाडीसभोवती सहाशे एकर कोरडवाहू शेती आहे. येथे सिंचनाअभावी फक्त भात, भुईमूग, नाचणी, ज्वारी ही खरीप पिके घेतली जातात. पावसाच्या लहरीवर शेती केली जाते. पावसाळ्यानंतर तरुण रोजगारासाठी ऊस तोडणी, हमाली किंवा लहान-मोठी कामे करत उदरनिर्वाह करतात. येथील शेतीला पाणी आल्यास गाव सुजलाम् सुफलाम् होईल. शेतीला पाणीपुरवठा करण्यासाठी कौलवच्या साठवण तलावातील पाणी लिफ्ट इरिगेशनमार्फत शेतीला देण्यासाठी सिंचन योजना राबवावी. पाेपले पाणंद, बारडवाडी रस्ता बांधणीचे काम करावे. यावेळी माजी सरपंच दत्तात्रय जाधव, तुकाराम पोपले, बाबूराव जाधव, संतोष पोपले, युवराज पाटील उपस्थित होते. आमदार आबिटकर यांनी मागणीचा सहानुभूतीपूर्वक विचार करण्याचे आश्वासन दिले.