कौलव-सिरसे ओढ्यावरील पुलाची उंची वाढवा
शाहूनगर ः कोल्हापूर-राधानगरी राज्यमार्गावरील कौलव ते सिरसे दरम्यान असणाऱ्या ओढ्यावरील पुलाची उंची वाढवावी, अशी मागणी बरगेवाडी युवक संघटनेचे संघटक तानाजी गुंडू बरगे यांनी सार्वजनिक बांधकाम विभागाकडे निवेदनाद्वारे केली आहे. निवेदनात म्हटले आहे की, कौलव ते सिरसे दरम्यानच्या रस्त्यावर भोपळेवाडी फाटा येथे असणाऱ्या पुलाची उंची कमी असल्यामुळे या ठिकाणी अपघाताची शक्यता आहे. हा पूल सखल भागात असल्याने या मार्गावरून ये-जा करणाऱ्या वाहनधारकांना पुलाचा अंदाज येत नाही. त्यामुळे वाहने चालवताना कसरत करावी लागते. आतापर्यंत येथे अनेक छोटे-मोठे अपघात झाले आहेत. भविष्यात या ठिकाणी अपघात होऊ नये, यासाठी सार्वजनिक बांधकाम विभागाने पुलाची उंची वाढवावी.