घोरपडे साखर कारखान्याला
को-जनरेशन पॉवरप्लांट पुरस्कार

सकाळ वृत्तसेवा
सेनापती कापशी, ता. ३ : काळम्मा बेलेवाडी (ता. कागल) येथील सरसेनापती संताजी घोरपडे साखर कारखान्याला राष्ट्रीय पातळीवरील सर्वोत्कृष्ट को-जनरेशन पॉवरप्लांट हा विशेष पुरस्कार जाहीर झाला. को-जनरेशन असोसिएशनने ही घोषणा केली. या पुरस्कारामुळे कारखान्याच्या तांत्रिक कार्यक्षमतेवर यशस्वी मोहर उमटविल्याचे अध्यक्ष नवीद मुश्रीफ यांनी सांगितले.
को-जनरेशन असोसिएशन ऑफ इंडिया यांच्यावतीने दिला जाणारा सन २०२३-२४ साठीचा पुरस्कार आहे. जानेवारी महिन्यात दिल्लीत होणाऱ्या खास कार्यक्रमात याचे वितरण होणार आहे. यामध्ये सहवीज प्रकल्प राबविणाऱ्या आदर्शवत संस्था व अधिकाऱ्यांना राष्ट्रीय स्तरावरील पुरस्काराने सन्मानित केले आहे. राष्ट्रीय पातळीवरील हा पुरस्कार मिळण्यात कारखान्याचे संस्थापक अध्यक्ष आमदार हसन मुश्रीफ यांचे काटेकोर व नियमित मार्गदर्शन, अध्यक्ष नवीद मुश्रीफ यांचे शिस्तबद्ध नियोजन आणि दररोजचा संपर्क याचा मोठा वाटा आहे. पुरस्काराबद्दल हसन मुश्रीफ, नवीद मुश्रीफ, जनरल मॅनेजर संजय घाटगे, को-जनचे मिलिंद पंडे, बी. ए. पाटील, भूषण हिरेमठ, अधिकारी व कामगारांचे कौतुक होत आहे.