बेकायदा खरेदी पत्राच्या चौकशीची मागणी
सरवडे : जमिनीच्या सातबारा उताऱ्यावर पूर्व हक्कदार तुकाराम बाळा एकशिंगे, दत्तू मन्नापा पाटील, दौलू नारायण पाटील यांची नावे नोंद असताना त्यांच्या परस्पर जमिनीची विक्री केली आहे. राधानगरी सह दुय्यम निबंधकांनी चुकीच्या पद्धतीने बेकायदेशीर खरेदी पत्र करून दिले आहे. याची चौकशी करावी, अशी मागणी संबंधितांच्या वारसांनी जिल्हाधिकारी व प्रांताधिकाऱ्यांकडे निवेदनाद्वारे केली आहे. निवेदनात म्हटले आहे की, सरवडे (ता. राधानगरी) येथील गट क्रमांक १६४६/१ त्याचे १.५५ आर या मिळकतीबाबत विजय रामचंद्र रानमाळे व स्वाती विजय रानमाळे यांनी दुय्यम निबंधक राधानगरी यांच्याकडे मार्च २०२५ मध्ये खरेदी पत्र केले आहे. ही मिळकत पूर्व हक्कदार आजअखेर कसत आहोत. सातबारा पत्रकी तुकाराम एकशिंगे, दत्तू पाटील, दौलू पाटील यांच्या नावाची आजतागायत नोंद आहे. या मिळकतीचे खरेदीपत्र बेकायदेशीर असून, त्याची खातेनिहाय चौकशी करावी तसेच झालेले खरेदी पत्र रद्द करावे, अशी मागणी केली आहे. निवेदनावर वारसदार दिनकर एकशिंगे, आबासाहेब एकशिंगे, कृष्णात पाटील, विठ्ठल पाटील यांच्या सह्या आहेत. निवेदनाच्या प्रती पालकमंत्री प्रकाश आबिटकर, महसूलमंत्री चंद्रशेखर बावनकुळे, तहसीलदारांना पाठविल्या आहेत.