विद्यार्थ्यांना सुविधा देण्यासाठी
इनरव्हील क्लब कटिबद्ध
वैशाली लोखंडे : शिरटी येथे कार्यक्रम
शिरोळ, ता. १३ : ग्रामीण भागातील विद्यार्थ्यांमध्येही गुणवत्ता आहे. या विद्यार्थ्यांचे भविष्य घडवण्याकरिता, शाळेला लागणाऱ्या भौतिक सुविधांच्या पूर्ततेसाठी इनरव्हील क्लब नेहमीच कटिबद्ध राहील, अशी ग्वाही इनरव्हील क्लबच्या डिस्ट्रिक्ट चेअरमन वैशाली लोखंडे यांनी दिली.
शिरटी (ता. शिरोळ) येथील शांतीसागर विद्यामंदिर या शाळेच्या भौतिक सुविधा पूर्ण करण्यासाठी जयसिंगपूर इनरव्हील क्लबने सहकार्य केले. त्यांच्या माध्यमातून शाळेची दुरुस्ती करून रंगरंगोटी करण्यात आली. शाळेस पुस्तके ठेवण्याचे रॅक, स्वच्छतागृहासाठी पाण्याची टाकी, विद्यार्थ्यांना लागणारे खेळाचे साहित्य अशा सुविधा उपलब्ध करून देण्यात आल्या. याबद्दल शाळेतर्फे इनरव्हील क्लबच्या पदाधिकाऱ्यांचा सत्कार करण्यात आला. यावेळी लोखंडे बोलत होत्या.
मुख्याध्यापिका शारदा पाटील यांनी स्वागत व प्रास्ताविक केले. यावेळी माजी सरपंच राहुल सूर्यवंशी यांनी केलेल्या सामाजिक कार्याची दखल घेऊन इनरव्हील क्लबतर्फे त्यांना सन्मानपत्र देऊन गौरविण्यात आले.
यावेळी जीवनधर चौगुले यांनी शिरटी गावातील सर्व अंगणवाड्यांना खुर्ची देणार असल्याचे सांगितले. इनरव्हील क्लबने शाळेतील गुणवंत विद्यार्थ्यांचा शैक्षणिक खर्च देण्याचे घोषित केले. या समारंभास इनरव्हील क्लबच्या डिस्ट्रिक्ट डायरेक्टर वसुंधरा कोल्हे-जयसिंगपूर, इनरव्हील क्लबच्या अध्यक्षा शिल्पा आडदांडे, नीलम बिरनाळे, ‘स्वाभिमानी’चे सौरभ शेट्टी, अलमनीसार मुल्लाणी, शाळा व्यवस्थापन समितीचे अध्यक्ष संपत रामोशी, दीपक हुपरे यांच्यासह शिक्षक, विद्यार्थी व पालक उपस्थित होते.