तंटामुक्त अध्यक्षाकडून मारहाण
शिरोळ, ता. ४ ः हसूर (ता. शिरोळ) येथील तंटामुक्ती समितीच्या अध्यक्ष व त्याच्या कुटुंबीयांनी युवकाला बांबूच्या काठीने मारून जखमी केले आहे. गावातील वाद मिटवण्याची जबाबदारी असलेल्या व्यक्तीकडूनच असा प्रकार घडल्याने परिसरात संताप व्यक्त केला जात आहे.
हसूर येथील सुरज परगोंडा ऐनापुरे (वय २८) या युवकाला ‘आमच्याकडे पाहून थुंकलास का’ या कारणावरून तंटामुक्ती अध्यक्ष रवींद्र चौगुले व त्यांच्या कुटुंबीयांनी बेदम मारहाण केली. संबंधित युवकाला लाथाबुक्क्यांनी व बांबूच्या काठीने मारहाण करून जीवे मारण्याचा प्रयत्न करण्यात आला. या घटनेनंतर जखमी युवकाने थेट शिरोळ पोलिस ठाणे गाठत तक्रार दाखल केली. या प्रकरणी तंटामुक्ती अध्यक्ष रवींद्र आप्पाराव चौगुले, मुलगा रोहन रवींद्र चौगुले, भाऊ दिलीप आप्पाराव चौगुले व पुतण्या चिदानंद दिलीप चौगुले यांच्यावर शिरोळ पोलिस स्टेशनमध्ये गुन्हा नोंद झाला.