गांधीनगर योजनेचा
पुरवठा तीन दिवस बंद
उजळाईवाडी, ता. १८ : महाराष्ट्र जीवन प्राधिकरणाच्या गांधीनगर प्रादेशिक नळ पाणीपुरवठा योजनेतील तेरा गावांचा पाणीपुरवठा आजपासून सलग तीन ते चार दिवस बंद राहणार आहे. महामार्गाच्या सहा पदरीकरणादरम्यान लक्ष्मी टेकडी येथे तीन ठिकाणी गळती लागली असून गळती काढण्यासाठी तीन दिवस लागणार असल्याने तीन ते चार दिवसांसाठी पाणीपुरवठा ठप्प होणार आहे, अशी माहिती जीवन प्राधिकरणाकडून संबंधित ग्रामपंचायतींना पत्रकाद्वारे कळविण्यात आली.
दरम्यान, मुसळधार पावसामध्ये तेरा गावांतील नागरिकांना पाण्यासाठी वणवण करावी लागणार आहे. नागरिकांकडून मात्र लवकरात लवकर गळती काढून पाणीपुरवठा सुरळीत करावा, अशी मागणी केली आहे. सततची गळती अपुरा अनियमित व काही वेळेस अशुद्ध पाणीपुरवठा यामुळे गांधीनगर प्रादेशिक पाणीपुरवठा योजना नेहमी वादाच्या भोवऱ्यात अडकली असून तेरा गावांतील नागरिकांना यामुळे वारंवार पाणीटंचाईला सामोरे जावे लागत आहे.