04750

वारणा महाविद्यालयात
सुसंवाद मेळावा

वारणानगर, ता. २३ : आमदार डॉ विनय कोरे यांच्या मार्गदर्शनाखाली वारणा विद्यापीठाची आम्ही नवी सुरुवात करीत आहोत. या विद्यापीठाच्या माध्यमातून सहकारमहर्षी तात्यासाहेब कोरे यांना अपेक्षित नवा माणूस घडवण्याचा मूळ विचार विद्यापीठाच्या केंद्रस्थानी ठेवला आहे. संस्थेच्या माध्यमातून विविध महाविद्यालयांची नव्याने सुरुवात करीत पंचक्रोशीमध्ये शैक्षणिक क्षेत्रात नवा मानदंड निर्माण करणार आहे, अशी माहिती वारणा विभाग शिक्षण मंडळाचे मुख्य कार्यकारी अधिकारी प्रो डॉ. व्ही. व्ही. कारजिन्नी यांनी दिली.
वारणा विभाग शिक्षण मंडळ व यशवंतराव चव्हाण वारणा महाविद्यालय यांच्या हीरक महोत्सवानिमित्त विद्यार्थी, शिक्षक, पालक, संस्था सुसंवाद मेळावा व गुणवंत विद्यार्थी सत्कारावेळी डाॅ. कार्जिन्नी बोलत होते. प्रा. नामदेव चोपडे यांनी स्वागत व प्रास्ताविक केले‌.
तात्यासाहेब कोरे यांनी २० जून १९६४ रोजी सुरू केलेल्या महाविद्यालयाला २० जून २०२४ रोजी साठ वर्षे पूर्ण झाली. या हीरक महोत्सवाच्या निमित्ताने या मेळाव्याचे आयोजन करण्यात आले होते.
डाॅ. कार्जिन्नी पुढे म्हणाले, "आज जगाच्या प्रगतीमध्ये प्रगतीचे सूत्र म्हणजे युवकांचा -सहभाग, सहकार्य व साधना हेच असल्याचे सांगितले. वारणा पंचक्रोशीतील सर्वसामान्य व छोट्या घटकांना शैक्षणिक क्षेत्रामध्ये नवी ओळख निर्माण करून देण्यासाठी संस्थेचे अध्यक्ष विनय कोरे प्रयत्न करीत आहेत."
प्राचार्य डॉ. ए. एम शेख यांनी आपल्या मनोगतामध्ये महाविद्यालयातील विद्यार्थ्यांच्यासाठी उपलब्ध सर्व सोयी सुविधा,भविष्यातील नियोजन, शैक्षणिक व क्रीडा क्षेत्राचा इतिहास, परीक्षा पद्धती ,सुसज्ज प्रयोगशाळा, स्पर्धा परीक्षा केंद्र, सीईटी ,नीट, जेईई या सर्व बाबीवर विशेष मार्गदर्शन केले.प्रांजल पाटील, पृथ्वीराज भोसले, आदर्श पाटील, मृदुला पवार, सतीश पाटील, प्रमोदिनी माने यांनी आपल्या भावना व्यक्त केल्या.
प्रा. शिल्पा पाटील व प्रा. डॉ. जांभळे यांनी सूत्रसंचालन केले. प्रा. व्ही.बी. बुढे यांनी आभार मांनले.