04322
...

दुर्गमानवाड, तळगाव परिसरात
बॉक्साईटची राजरोस तस्करी
राशिवडे बुद्रुक, ता. २९ : राधानगरी तालुक्यातील दुर्गमानवाड, तळगाव परिसरातील डोंगरांमध्ये विनापरवाना बॉक्साईटची तस्करी राजरोस सुरूच आहे. तळगावच्या डोंगरकुशीत असलेल्या पाझर तलावाला लागून व चाफेवाडी परिसरात मोठ्या प्रमाणात बॉक्साइट उत्खनन सुरू असल्याचे निदर्शनास येत आहे. महसूल खात्याचेही दुर्लक्ष असल्याचा सूर शेतकऱ्यांकडून निघत आहे.
दुर्गमानवाड परिसरातील चाफेवाडी, धुमाळवाडी परिसरात असलेल्या पडीक जमिनीमधून जेसीबीद्वारे उत्खनन करून बॉक्साइट रातोरात गायब करणारी राधानगरी व भुदरगड परिसरातील टोळी कार्यरत आहे. दुर्गमानवाड तलाठी सज्जात जेसीबीचा आवाज ऐकू येईल इतक्या अंतरावर उत्खनन सुरू आहे. पाझर तलावाच्या भिंतीवरूनच गेलेल्या मार्गाने पुढे गेल्यास येथे ठिकठिकाणी परिसर खणलेला आहे. ट्रकचे माग दिसतात. येथे रात्री उत्खनन केले जाते. हे ट्रक महसूल खात्याच्या तलाठी आणि मंडल अधिकारी कार्यालयाच्या दारावरून जातात तरीही त्याचा त्यांना पत्ता नाही. याबाबत तहसीलदार अनिता देशमुख यांना विचारले असता सध्या निवडणूक प्रशिक्षणात सगळे अडकून असल्याने चौकशी करणे अडचणीची ठरत असल्याचे सांगितले.