कोल्हापूर : पर्यटनातून ग्रामीण विकास, अशी संकल्पना घेऊन यंदाचा पर्यटन दिवस साजरा होत आहे. मात्र, कोरोनाच्या संकटात पर्यटन ठप्प झाले. यात परदेशी पर्यटनाला जवळपास ५० कोटींचा फटका बसला आहे. संपूर्ण लॉकडाउन उठल्यानंतर पर्यटन पुन्हा जोमाने सुरू होईल. त्यासाठी पर्यटन व्यावसायिक आतूर आहेत. 

परदेशी पर्यटन सेवा देणाऱ्या जवळपास ५० ट्रॅव्हल्स एजन्सी येथे आहेत. त्यांच्याकडे कोल्हापुरातून महिन्यात सरासरी २० ते ४० कुटुंबांचे परदेशी पर्यटनासाठी बुकिंग होते, कोरोना येण्यापूर्वी येथील पर्यटकांनी विदेशी पर्यटनाचे बुकिंग केले. युरोप, मॉरेशीस, लंडन, थायलंड, मलेशिया, बॅंकॉक, सिंगापूर, दुबई, मालदीव आदी देशात पर्यटन करण्यासाठी पर्यटकांनी पैसे भरून ट्रॅव्हल्स एजन्सीकडे बुकिंग केले.

हेही वाचा-कोल्हापूर जिल्ह्यात निघतोय गांजाचा धूर... -

दीड ते तीन लाखांची पॅकेज घेतली. ट्रॅव्हल्स कंपन्यांनीही परदेशात हॉटेल बुकिंग व विमान प्रवासाचे बुकिंग केले. पुढे लॉकडाउन झाला. विमान सेवा बंद झाली, त्यानंतर दोन महिन्यांत सर्व पूर्ववत सुरू होईल, असे वाटत होते; मात्र पुढे आणखी तीन महिने विमान सेवा बंद राहिली अजूनही कोरोनावर लस येत नाही. अशा स्थितीत परदेशी पर्यटनासाठी बुकिंग केलेल्या पर्यटकांपैकी काहींनी पैसे परत मागितले; पण ज्या ट्रॅव्हल्स कंपन्यांनी परेदशात हॉटेल बुकिंग केले किंवा विमानाचे तिकीट बुकिंग केले आहे. त्यांनीही संबंधित ट्रॅव्हल्स एजन्सीना पैसे परत दिलेले नाहीत. 

हेही वाचा- माता कोरोना पॉझिटिव्ह; बाळ मात्र निगेटीव्ह -

त्यामुळे परदेशी पर्यटन रद्द केल्याने स्थानिक ट्रॅव्हल्सवाले पैसे परत देणेही अवघड झाले आहे. बहुतांशी पर्यटकांनी पैसे परत मागण्याऐवजी पुढे पर्यटनासाठी पुढची तारीख मागितली आहे. 
‘‘परदेशात जाण्यासाठी ज्यांनी यापूर्वी बुकिंग केले होते. त्यासाठी काही कोटींची गुंतवणूक झाली, मात्र विमानसेवा बंद असल्यामुळे ज्यांचे पर्यटन होऊ शकलेले नाही, अशांना ‘क्रेडिट सेल’ या प्रकारात पुढे प्रवास व पर्यटनाची सेवा देण्यात येईल. बंद असलेली विमानसेवा कोरोनाची लस आल्यानंतर सुरू होईल, तरीही अनेक पर्यटक परदेशी पर्यटनासाठी इच्छुक आहेत. त्यांच्याकडून पर्यटनाची चौकशीही सुरू झाली आहे.
- रवींद्र पोतदार, व्यवस्थापक गिरीकंद ट्रॅव्हल्स 
    
‘‘वर्षाला कोल्हापुरातून किमान ५ ते १० हजार लोक परदेशात जातात. तेवढेच परदेशातून कोल्हापुरात येतात. येथील हॉटेलांपासून ते स्थानिक पर्यटन सुविधा ठप्प आहेत. येथील अर्थकारणावर परिणाम झाला आहे. विमानसेवा सुरू झाली, तर परदेशी पर्यटक कोल्हापुरात येऊन येथील अर्थकारणाला गती मिळेल.’’
- जय देशपांडे, पर्यटन सल्लागार.

संपादन - अर्चना बनगे