बेळगाव - जिल्ह्यात नव्या 22 रुग्णांची आज (ता.10) भर पडली. त्यामुळे बेळगाव जिल्ह्यात कोरोना बाधितांच्या आकड्याने शंभरी पार केली आहे. जिल्ह्यात 107 कोरोना पॉझिटिव्ह रुग्णांची संख्या झाली आहे. त्यामुळे जिल्ह्यात कोरोनाचा कहर कायम आहे. बाधित मुळचे बेळगावचे आहेत. अजमेर येथे गेले होते. ते परतल्यानंतर त्यांना निपाणीत क्वारंटाईन केले होते. त्यांचा अहवाल आज आला असून, पैकी 22 जणांना कोरोना लागण झाली आहे. बाधितांना निपाणीत ठेवल्याने जिल्ह्यामध्ये अन्यत्र कोठे नवीन निर्बंधीत (कॅन्टेन्मेंट झोन) क्षेत्र केले जाणार नाही, अशी माहिती आरोग्य विभागाने दिली आहे.

जिल्ह्यात कोरोना बाधितांची आकडा 107

बेळगाव येथील रहिवाशी काही दिवसांपूर्वी राजस्थानला गेले होते. परत आल्यानंतर त्यांना 14 दिवस निपाणीत क्वारंटाईन केले. घशातील स्वॅब घेऊन प्रयोगशाळेला पाठविले होते. अहवाल उपलब्ध झाला असून, अजमेर दौऱ्यावरून परतलेल्या 22 जणांना कोरोना झाल्याचे निदान झाले आहे. यामुळे कोरोना पॉझिटिव्ह 85 मध्ये नवीन 22 रुग्णांची भर पडल्यामुळे जिल्ह्यात कोरोना बाधितांची आकडा 107 वर पोचला आहे. दरम्यान, कोरोना पाझिटिव्ह रुग्ण संख्येने बेळगावने शंभरचा आकडा पार केल्यामुळे क्रमवारीत बेळगाव जिल्ह्याने म्हैसूरला मागे टाकत दुसऱ्या स्थानावर पोचले आहे.

पाच ते सहा जणांनी अजमेर दौरा केला

बाधितांचे अनुक्रमे वय 50, 38, 17, 60, 10, 14, 40, 63, 20, 56, 29, 60, 25, 3, 46, 50, 12, 14, 27, 8. 3, 6 असे आहे. 22 पैकी 16 महिला आणि 6 पुरुष आहेत. पहिल्यांदा टप्प्यात 22 जणांचा अहवाल पॉझिटिव्ह आला असून, त्यामध्ये आणखी काही जणांचा भर पडू शकते. सर्वांना कोरोना कक्षात दाखल केले आहे. अन्य पाच ते सहा जणांनी अजमेर दौरा केला असून, त्यांच्यातही कोरोना झाल्याची लक्षणे दिसून आली आहे. त्या नमुन्यांकडेही सर्वांचे लक्ष लागून आहे.

जिल्ह्यात कोरोना बाधितांची संख्या 107 झाली आहे. त्यापैकी 36 जणांना डिस्चार्ज देण्यात आला आहे. कोरोनाने एकाचा बळी गेला आहे. त्यामुळे कोरोनावर उपचार घेत असलेल्या रुग्णांची संख्या 70 झाली आहे.