कोल्हापूर : कोरोनाच्या प्रादुर्भावाचा विद्यार्थी व कर्मचाऱ्यांवर परिणाम होणार नाही, याची दक्षता घेण्याबाबत जिल्हाधिकाऱ्यांना सूचना देण्यात आली आहे. कोरोनाचा प्रादुर्भाव वाढल्यास त्याअनुषंगाने निर्णय घेण्याचे राज्य शासनाने जिल्हाधिकाऱ्यांना कळविले आहे, अशी माहिती उच्च व तंत्रशिक्षण मंत्री उदय सामंत यांनी आज पत्रकारांशी बोलताना दिली. राज्याला व देशाला दिशा देणाऱ्या शिवछत्रपतींची जयंती 'स्वराज दिन,' म्हणून महाविद्यालयांत साजरी करण्यात येणार असल्याचेही त्यांनी स्पष्ट केले. 

सामंत म्हणाले, 'पंधरा दिवसांपूर्वी सर्व कुलगुरूंसोबत बैठक घेऊन महाविद्यालये सुरू करण्याची घोषणा केली. सध्या कोरोनाची परिस्थिती पाहून विद्यार्थी आणि कर्मचाऱ्यांची संख्या कमी होणार नाही, याची दक्षता घ्यावी लागणार आहे. कोरोनाचा प्रादुर्भाव वाढला तर त्या संदर्भात आवश्यक निर्णय घेण्याबाबत जिल्हाधिकार्‍यांना सांगण्यात आले आहे. छत्रपती शिवाजी महाराजांचा विचार विद्यार्थ्यांसमोर राहावा, या उद्देशाने महाविद्यालयांत 'स्वराज्य दिन' साजरा केला जाणार असून, त्याबाबतचे परिपत्रक येत्या आठ दिवसांत प्रसिद्ध केले जाणार आहे.'

हेही वाचा - जयंत पाटील यांच्या खेळीने भाजप घायाळ का ? ९ नगरसेवक अजूनही नॉट रिचेबल -

ते म्हणाले, 'कोरोनाचा प्रादुर्भाव केवळ महाराष्ट्रात नाही. तो दिल्ली, गुजरात, मध्यप्रदेश येथेही वाढत आहे. कोरोनाची दुसरी लाट येऊ नये, यासाठी महाविकास आघाडी सरकार उपाय योजना करत आहे. या परिस्थितीत भाजपचे प्रदेशाध्यक्ष चंद्रकांत पाटील अधिवेशन होऊ नये, म्हणून कोरोनाचा संसर्ग वाढत असल्याचा आरोप करत असतील तर या विषयावर काय बोलावे? गुजरातमध्येही अधिवेशन आहे. ते होऊ नये, म्हणून कोरोनाचा संसर्ग वाढतोय का?'

संपादन - स्नेहल कदम