कोल्हापूर : शिवछत्रपतींनी पुनर्बांधणी करून घेतलेला व मराठा आरमाराच्या प्रमुख शक्तीकेंद्रापैकी एक असलेल्या किल्ल्याच्या संवर्धनाच्या कामाला लवकरच प्रारंभ होणार असल्याची माहिती आज  खासदार संभाजीराजे छत्रपती  यांनी  सोशल मीडियावरून दिली आहे.

त्यांनी केलेल्या पोस्टमध्ये म्हटले आहे की, "विजयदुर्ग किल्ल्याची तटबंदी समुद्राच्या लाटांनी झिजवली आणि बुरुजचा भाग ढासळत असल्याचे निदर्शनास आले होते. स्वराज्यातील आरमाराचे प्रमुख शक्तीकेंद्र असलेला महत्वाचा जलदुर्ग काळाच्या ओघात विदीर्ण अवस्थेत पोचला असल्याचे काही शिवभक्तांनी लक्षात आणून दिले होते. अॉगस्ट महिन्यात विजयदुर्गला भेट देऊन पाहणी सुध्दा केली होती. केंद्रीय सांस्कृतिक मंत्र्यांना भेटून गडाच्या सद्यपरिस्थितीची माहिती देऊन, लवकरच तटबंदीचे व बुरुजाचे काम सुरु करण्यासाठी आवश्यक ती कार्यवाही करावी, अशी मागणी केली होती.

हेही वाचा- पदवीधर निवडणुकीसाठी  विश्वजित कदम-अरुण लाड एकत्र; आता ग्रामपंचायतसाठी काय करणार? 

आज मुंबई पुरातत्त्व कार्यालयाकडून  पत्र प्राप्त झाले असून लवकरच गडावर संवर्धनाचे काम सुरु करण्यात येणार आहे व त्यासाठी दिल्लीतील पुरातत्व सर्वेक्षण कार्यालयाकडून सुध्दा मान्यता मिळाली आहे. सर्व शिवभक्तांच्यावतीने केंद्रीय सांस्कृतिक मंत्र्याचे विशेष आभार."

संपादन- अर्चना बनगे