गडहिंग्लज (कोल्हापूर) : दुंडगे (ता. गडहिंग्लज) येथील नवीन वसाहतीतील विवाहितेवर अत्याचार करण्याचा प्रयत्न करणाऱ्या तरुणाला ग्रामस्थांनी बेदम चोप दिला. त्यानंतर त्याला पोलिसांच्या ताब्यात देण्यात आले. सुनील जंबू मादर (वय २७, मूळ रा. शरावतीनगर हुबळी, सध्या रा. दुंडगे) या संशयिताविरुद्ध पोलिसांत गुन्हा दाखल केला. आज सकाळी आठच्या सुमारास ही घटना घडली.

पोलिसांनी सांगितले, संबंधित २० वर्षीय विवाहिता भावाकडे दुंडगेत आली आहे. आज सकाळी तिचा भाऊ शेताकडे गेला होता. यामुळे विवाहिता घरी एकटीच होती. त्यावेळी सुनीलने तिच्या दारात जाऊन दादा आहे का, अशी विचारणा केली. तो घरी नसल्याचे समजताच सुनील घरात घुसला आणि तिच्यावर अत्याचार करण्याचा प्रयत्न केला. तिला फरफटत जेवण खोलीत ओढून घेऊन जात असताना विवाहितेने ओरड केली. त्यावेळी शेजारील दोन महिला धावून गेल्या. सुनीलने या महिलांना धक्का देऊन तेथून पसार झाला. या प्रकाराने संतप्त झालेल्या ग्रामस्थांसह काही तरुणांनी सुनीलला बेदम चोप देऊन पोलिसांच्या ताब्यात दिले.

हेही वाचा - हवे ते महाविद्यालय देतो, पण प्रवेश घ्या ; शिक्षण विभागाची विद्यार्थ्यांना विनंती -

ही घटना समजताच महिला आणि तरुणांनी संशयित सुनीलवर कठोरातील कठोर कारवाई व्हावी, या मागणीसाठी पोलिस ठाण्यासमोर ठिय्या मारला. दरम्यान, माजी आमदार श्रीपतराव शिंदे, जनता दलाचे तालुकाध्यक्ष बाळेश नाईक, दत्ता मगदूम यांनी पोलिस ठाण्याला भेट देऊन या घटनेची गंभीर दखल घेण्यासह आरोपीवर कठोर कारवाई करण्याची मागणी पोलिस निरीक्षक प्रकाश गायकवाड यांच्याकडे केली. याप्रकरणी संबंधित विवाहितेने सुनीलविरुद्ध फिर्याद दिली असून अधिक तपास सहायक पोलिस निरीक्षक स्वाती सूर्यवंशी करीत आहेत. 

हुबळीतही गुन्हा

सुनील मूळचा कर्नाटकातील हुबळीचा आहे. तेथेही त्याच्या विरोधात अशाच प्रकारचा गुन्हा दाखल असल्याचे पोलिसांनी सांगितले. त्यानंतर तो काही महिन्यांपासून दुंडगेतील मामाकडे राहायला आला असून त्यांच्याकडेच तो काम करतो. या घटनेबद्दल संतप्त भावना व्यक्त होत आहेत.

संपादन - स्नेहल कदम