राधानगरी (कोल्हापूर) : राधानगरी धरणाच्या (Radhanagari Dam) मुख्य भिंतीचे मुख्य दरवाजे तांत्रिक दोषामुळं अचानक उचलल्याने राधानगरी धरणातून मोठ्या प्रमाणात पाण्याचा प्रवाह भोगावती नदीत (Bhogawati River) सुटला आहे. यामुळं नदीला प्रचंड वेगानं पाणी वाढण्याची शक्यता असून काठावरील नागरिकांना सावधानतेचा इशारा देण्यात आलाय. आज पहाटे धरणाच्या मुख्य दरवाजाचे काम करत असताना अचानक दरवाजा उचलला व मुख्य गेटमधून पाण्याचा प्रवाह नदीपात्रात सुरू झालाय.

याचा परिणाम म्हणजे, भोगावती नदीचे पाणी पात्राबाहेर येणार असून त्यामुळं काठावरील विद्युत पंप, काठावरील नागरिक आणि घाटावर कपडे धुण्यासाठी गेलेल्या नागरिकांना व जनावरांना याचा फटका बसू शकतो. तातडीनं नागरिकानी सतर्क राहून काठावर कुणालाही न जाऊ देण्याचा इशारा संबंधित विभागानं केलाय. या दरवाजाचे काम तातडीनं युद्धपातळीवर सुरू असून लवकरच पूर्ववत असेल, अशी माहिती स्थापत्य उप अभियंता विवेक सुतार (Vivek Sutar) यांनी दिलीय.