गांधीनगर (कोल्हापूर) : येथील एका भिशीचालक महिलेने सुमारे पंचवीस लाख रक्कम घेऊन पोबारा केला आहे. फसगत झालेल्या महिला गांधीनगर पोलिस ठाण्यावर आल्या होत्या; पण संबंधित भिशीचालक महिलेवर गुन्हा दाखल झाला नाही. धुणीभांडी आणि मोलमजुरी करून जमवलेली रक्कम गेल्याने भिशीधारक महिलांची कोंडी झाली आहे. दसरा-दिवाळीच्या तोंडावर ही फसगत झाल्याने परिसरात संतप्त प्रतिक्रिया उमटत आहेत.

हेही वाचा - इंग्रजीने दिले जगण्याचे बळ अन्‌ ध्येयही! 

परिसरात भिशीच्या नावाखाली सावकारीचे लोण वाढत आहे. संबंधित भिशी चालवणारी महिला कोयना कॉलनीमध्ये किराणासदृश दुकान चालवत होती. त्यातून तिची अनेक महिलांबरोबर ओळख झाली. त्यातून महिलेने भिशी चालू केली. त्यामध्ये सुमारे तीनशे महिला सभासद असल्याची चर्चा आहे. काही महिलांचे दीड लाख भिशीमध्ये अडकले आहेत. संबंधित भिशी चालक महिलेने बचत गट चालवते असे सांगूनही रक्कम जमा केली होती, असे फसगत झालेल्या महिला उघडउघड सांगत आहेत.

हेही वाचा - कोल्हापुरी चप्पल मिळणार आता ऑनलाइन ; जागतिक बाजारपेठेत प्रवेश

पाच हजारांपासून लाख दीड लाख रक्कम महिलेकडे जमा केली होती. २५ लाख रुपयांची फसवणूक झाल्याची चर्चा जरी सुरू असली तरी हा आकडा मोठा असण्याची शक्‍यता आहे. घरकाम आणि म्हशी पाळून काबाडकष्ट करणाऱ्या महिलेने आपली दीड लाखाची रक्कम भिशीचालक महिलेकडे असल्याचे पोलिस ठाण्यासमोरच बोलून दाखवले. जमलेल्या महिलांच्या डोळ्यांमध्ये अश्रुंच्या धारा लागल्या होत्या.

"भिशीत फसगत झालेल्या महिलांची फिर्याद नोंदवून घेऊन तपास करणार आहोत."

- दीपक भांडवलकर, सहायक पोलिस निरीक्षक, गांधीनगर

संपादन - स्नेहल कदम