इचलकरंजी : वस्त्रोद्योगातील महत्वाचा घटक असलेल्या यार्न रिवायडिंग उद्योगास (Yarn rewinding industry) २ रुपयांची प्रति युनिट वीज सवलत देण्याची घोषणा आज वस्त्रोद्योग राज्यमंत्री राजेंद्र पाटील - यड्रावकर (Rajendra Patil-Yadravkar) यांनी केली. मंत्रालयात झालेल्या एका महत्वपूर्ण बैठकीत हा निर्णय घेण्यात आला. त्यामुळे रिवायडिंग उद्योगाला प्रथमच वीज दरात सवलत मिळणार असल्यामुळे रिवायडिंग उद्योजकांना मोठा दिलासा मिळाला आहे.

महाराष्ट्रातील वस्त्रोद्योगातील अनेक घटकांना वीज दरातील सवलत मिळत आहे. परंतू यार्न रिवायडिंग हा उद्योग वीज दर सवलतीपासून वंचित होता. या उद्योगाची वीज दर आकारणी वाणिज्य दरांने होत आहे. यामुळे हा उद्योग अडचणीत येत होता. या उद्योगाला सावरण्यासाठी यार्न वायडींग असोसिएशनने राष्ट्रवादीचे प्रांतिक सदस्य मदन कारंडे यांच्या मार्गदर्शनाखाली राज्याचे वस्त्रोद्योग राज्यमंत्री राजेंद्र पाटील यड्रावकर यांच्याकडे वस्त्रोद्यातील इतर घटकांप्रमाणे वीज दर सवलत मिळावी, अशी मागणी केली होती. त्यानंतर मंत्र्यांनी आज मंगळवारी या संदर्भात महत्वाची बैठक घेतली.

बैठकीत वस्त्रोद्योग सचिव पराग जैन व वस्त्रोद्योग संचालक श्री.खरात, कक्ष अधिकारी मदने यांच्याशी सविस्तर चर्चा केली. त्यानंतर या उद्योगाल प्रति युनिट २ दोन रुपये वीज दर सवलत देण्याची घोषणा केली. त्याची तत्काळ अमंलबजावणी करण्यात येणार असल्याचे मंत्री यड्रावकर यांनी सांगितले. बैठकीस मदन कारंडे, अमित गाताडे यांच्यासह वायडिंग असोसिएशनचे पदाधिकारी राजेंद्र पारीक, सुनिल शिंदे, सचिन पाटील, सोमनाथ टकले उपस्थीत होते.

इचलकरंजीत ४५० उद्योगांना लाभ

इचलकरंजी शहरात सुमारे ४५० रिवायडिंग उद्योग आहेत. या उद्योगांना वीज दरातील सवलतीचा मोठा लाभ मिळणार आहे. इचलकरंजीसह राज्यातील भिवंडी, मालेगाव, विटा आदी यंत्रमाग केंद्रातील रिवायडिंग उद्योगालाही या निर्णयाला मोठा लाभ मिळणार आहे.