कोल्हापूर - साडेतीन मुहूर्तांपैकी एक शुभ मुहूर्त असलेल्या अक्षय्य तृतीयेवर यंदा कोरोनाचे सावट आहे. या मुहुर्तावर सोने - चांदी, इलेक्‍ट्रॉनिक्‍स वस्तू, दुचाकी - चारचाकी वाहनांचे बुकिंग, फ्लॅट - घरांचे बुकिंग केले जाते. यंदा मात्र टाळेबंदीमुळे या सर्वांनाच ब्रेक लागला आहे. त्यामुळे या क्षेत्रात अक्षय्य तृतीयेच्या मुहुर्तावर होणाऱ्या कोट्यावधींच्या उलाढाली ठप्प झाल्या आहेत. यावर आधारित असलेल्या व्यवसायांनाही याचा फटका बसला आहे.
मात्र, यंदा या खरेदीवर कोरोनाचे सावट ओढावले आहे. एरवी या दिवशी गजबणारा गुजरी, महाव्दार रोड, शिवाजी रोड, बिंदू चौक या सर्व परिसरात निरव शांतता पसरली आहे.

वाचा - कोरोनाग्रस्तांवर उपचार करण्यासाठी कोल्हापुरात दाखल झालंय 'हे' मशिन...

अक्षय्य तृतीयेला सोने खरेदी केल्यास ते वृद्धिंगत होत जाते, अशी धारणा आहे. त्यामुळे या दिवशी प्रामुख्याने एक ग्रॅमपासून ते तोळ्यापर्यंतची सोनेखरेदी करण्यावर भर दिला जातो. या खरेदीतून मोठी उलाढाल होते. त्यामुळे या खरेदीला मोठा फटका बसला आहे. तसेच या मुहुर्तावर मोबाईल, एलईडी टिव्ही, फ्रीज या वस्तूंची खरेदीही मोठ्या प्रमाणात केली जाते. सध्या इलेक्‍ट्रॉनिक्‍स दुकानेही बंद असल्याने इलेक्‍ट्रॉनिक्‍स वस्तूंची खरेदी विक्रीही होणार नाही.

ऑनलाईन खरेदीकडे कल

शहरातील ग्राहकांना सोने, चांदी खरेदी करता यावी, यासाठी दागिन्यांच्या मोठ्या शोरूम्सनी ऑनलाईन खरेदीची सुविधा सुरू केली आहे. वेबसाईटवरील डिझाईन्स पाहून ग्राहकांना नोंदणी करता येते. या दागिन्यांची डिलिव्हरी मात्र लॉकडाऊन नंतर होणार आहे. अशा खरेदीकडे शहरातील ग्राहकांनी पसंती दिली आहे, असे "तनिष्क चे प्रसाद कामत यांनी सांगितले. मात्र गाड्यांचे बुकिंग ऑनलाईन करता येत असले तरी ग्राहकांनी त्याकडे पाठ फिरवली आहे.
 

अक्षय्य तृतीयेच्या मुहुर्तावर सोन्याची खरेदी मोठ्या प्रमाणावर होते. मात्र लॉकडाऊनमुळे सध्या सोने चांदी ग्राहकांना खरेदी करता येणार नाही. आम्ही सराफ व्यावसायिक शासनाच्या नियमांचे पालन करणार आहोत.
- भरत ओसवाल, अध्यक्ष, कोल्हापूर जिल्हा सराफ संघ

लॉकडाऊन काळात गाड्यांचे मार्केट थंडावलेले आहे. दुचाकींची नोंदणी करता येते. मात्र त्याकडे ग्राहकांनी पाठ फिरवली आहे.
- राजेंद्र गुरव, मोहिते सुझुकी