कागल : आज भरदुपारी रस्त्यावर धारदार शस्त्राने वार करून येथे एका तरूणाचा खून करण्यात आला. महात्मा फुले वसाहतीजवळ लक्ष्मी मंदीरासमोर दुपारी दोनच्या सुमारास ही घटना घडली. आकाश विनायक सोनुले उर्फ मॅनर्स (वय २८, रा. मातंग वसाहत, कागल) असे मयत तरुणाचे नाव आहे. खून केल्यानंतर हल्लेखोर मोटरसायकलवरून पसार झाले.

लॉकडाऊनमुळे कागल शहरातील रस्ते शांत व निमर्नुष्य आहेत. शहरातील सर्व दुकाने बंद आहेत. रस्त्यावर किरकोळ रहदारी आहे. अशा परिस्थितीत येथील महात्मा फुले वसाहतीजवळील लक्ष्मी मंदीर समोरून आपल्या घराकडे आकाश जात होता. यावेळी तेथे थांबलेल्या दोघा हल्लेखोरांनी त्याला थांबून डोळ्यावर मिरचीपूड फेकल्याचे समजते. त्यानंतर त्याच्यावर धारदार शस्त्राने सपासप १६ वार करण्यात आले. या हल्ल्यात आकाश रक्तबंबाळ होऊन जोरात किंचाळत जागेवर कोसळला. तो जाग्यावर निचपित पडल्यावर दोन हल्लेखोर मोटरसायकलवरून सांगाव नाक्याच्या दिशेने पसार झाले. जमलेल्या तरुणांनी आकाशला उपचारासाठी नेले, मात्र उपचारापूर्वीच तो मयत झाला. 

हे पण वाचा - कोल्हापूर - सकाळी अहवाल निगेटिव्ह आला अन् दुपारी कोविड सेंटरमध्येच संपविले जीवन

 घटनास्थळी अप्पर पोलीस अधिक्षक तिरुपती काकडे, करवीरचे उपविभागीय अधिकारी डॉ. प्रशांत अमृतकर, कागलचे पोलिस निरीक्षक दत्तात्रय नाळे यांनी भेट देऊन पाहणी केली. तसेच फ्लॉरेन्सिक लॅबच्या तज्ञांनी घटनास्थळी भेट देऊन मिळालेल्या शस्त्राची पाहणी केली. पोलीस हल्लेखोरांचा शोध घेत आहेत. 
आकाश हा ठेकेदार म्हणून छोटी मोठी गटारीची कामे करीत होता. 

संपादन - धनाजी सुर्वे