नागाव (कोल्हापूर)  : मोटारीच्या धडकेत जखमी मोटारसायकलस्वाराचा आज मृत्यू झाला. फिरोज सलीम पठाण (रा. शिये, ता. करवीर) असे मृताचे नाव आहे. शिये-कसबा बावडा मार्गावर रविवारी (ता. 9) रात्री आठच्या सुमारास हनुमान नगर शिये येथे हा अपघात झाला होता. मोटारचालक दत्तात्रय बाबूराव घोडके यांनी याबाबत पोलिसात माहिती दिली.

चालकानेच दिली फिर्याद

दत्तात्रय घोडके मोटार (एमएच 09 डीएक्‍स 1006) घेऊन शिये - कसबा बावडा मार्गाने कोल्हापूरकडे निघाले होते. हनुमान नगर येथील महालक्ष्मी हॉस्पिटलजवळ आले असता, फिरोज पठाण हा मोटारसायकल (एमएच 09 इ वाय 2390) घेऊन अचानक मोटारीवर आदळला. यामध्ये पठाण जखमी झाला. तर मोटारीचे मोठे नुकसान झाले होते. फिरोज पठाण हा मद्यधुंद अवस्थेत मोटारसायकल चालवत असल्याचे घोडके यांच्या निदर्शनास आले. याबाबत दत्तात्रय घोडके यांनी पोलिसांना बोलावून फिरोज पठाण यांच्यावर मोटारीचे नुकसान केल्याची फिर्याद दिली होती. अपघातामध्ये पठाण जखमी झाला होता. कोल्हापुरातील खासगी दवाखान्यात उपचार सुरू असताना आज त्याचा मृत्यू झाला. अधिक तपास सहाय्यक पोलिस निरीक्षक किरण भोसले यांच्या मार्गदर्शनाखाली सुरू आहे.