सांगली : कृष्णा नदीचा (krishna river flood) महापूर उतरायला सुरवात झाली आहे. (sangli rain update) कराड येथे पाणी चार फुटांनी उतरले आहे. सांगलीत सायंकाळी पाचनंतर पाणी पातळी उतरायला सुरवात होईल. तोवर सांगलीत पातळी 51 ते 52 फुटापर्यंत पोहचू शकते. महापुर आता नियंत्रणाखाली येत आहे, उद्या सकाळपर्यंत पाणी गतीने पात्राकडे सरकलेले असेल, असे पाटबंधारेचे मुख्य अभियंता हनुमंत गुणाले यांनी 'सकाळ'शी बोलताना सांगितले. (sangli) ते म्हणाले, कृष्णा नदीचा महापूर ओसरायला सुरवात झाली आहे. कोयना धरणातून विसर्ग कमी केला आहे. पाऊसही थांबला आहे. (heavy rain) कराडमधे पाणी चार फुटाने उतरले आहे, भिलवडीत उतार लागला आहे. सांगलीत चारनंतर परिणाम दिसून येईल."

दरम्यान, राज्याचे उपमुख्यमंत्री अजित पवार या परिस्थितीवर स्वतः लक्ष ठेवून आहेत. पाटबंधारे विभागाच्या प्रमुख अधिकाऱ्यांसोबत सध्या ते चर्चा करत असून कृष्णा नदीचे पाणी वाढू नये यासाठी कोणत्या उपाययोजना करता येतील याबाबत विचारविनिमय सुरू आहे. कृष्णा नदीला महापूर आला असून सांगलीत कृष्णा नदीची पाणीपातळी आयर्विन पुलाजवळ पन्नास फुटांवर पोहोचली आहे. सन 2019 ला पाणीपातळी 57 फुटांपर्यंत पोचली होती. तशीच परिस्थिती पुन्हा येईल का? अशी भीती सांगलीकरांच्या मनात आहे. त्यामुळे लोकांचे गतीने स्थलांतर केले जात आहे.

कर्नाटकातील अलमट्टी धरणातून पाण्याचा विसर्ग साडेतीन लाखाच्या घरात सुरू आहे. या संपूर्ण स्थितीचा आढावा घेण्यासाठी उपमुख्यमंत्री अजित पवार हे जलसंपदा विभागातील अधिकाऱ्यांशी चर्चा करत आहेत. परिस्थिती नियंत्रणाखाली रहावी यासाठी आवश्यक उपाययोजना, कर्नाटक राज्याशी सतत समन्वय आणि लोकांची सुरक्षा या विषयावर राज्य शासनाने स्पष्ट सूचना दिल्या असून त्या हालचालींचा आढावाही ते घेत असल्याचे सांगण्यात आले.