कुपवाड : महापालिकेच्या मालमत्ता कर निर्धारण व संकलन विभागाने कुपवाड भागातील घरपट्टी वसुलीसाठी गेली महिनाभर कंबर कसली आहे. मालमत्ता करात दंड/शास्ती माफीसाठी अमलात आणलेल्या अभय योजनेंतर्गत 15 मार्च 21 अखेर 3 कोटी 38 लाख रकमेची वसुली कुपवाड कर निर्धारण व संकलन विभागाच्या तर्फे करण्यात आली. 

कुपवाड महापालिका क्षेत्रामध्ये नोंदणीकृत घरपट्टी धारकांची संख्या 26027 इतकी आहे. कर निर्धारण व संकलन विभागाच्या वतीने दर वर्षी 70 ते 80 टक्के वसुली केली जाते. न्यायालयीन बाब आणि पडक्‍या इमारतींच्या मालमत्तेपोटी उर्वरित 20 ते 30 टक्के वसुली प्रलंबित राहते, अशी माहिती कर निरीक्षक गणी सय्यद यांनी दिली. 

अभय योजने बद्दल सय्यद म्हणाले,""महापालिकेच्या अभय योजनेद्वारे नागरिकांना दिलासा मिळाला आहे. योजनेचा कालखंड 15 फेब्रुवारी ते 31 मार्च असा असून याद्वारे दंड, व्याजामध्ये 100 टक्के माफी दिली जाणार आहे. संपूर्ण कुपवाड परिक्षेत्रात जनजागृतीचे काम सुरू केले आहे. वसुलीच्या भरण्यासाठी एका फिरत्या पथकाची नियुक्ती केली आहे. यंदावर्षी 9 कोटी 34 इतके वसुलीचे उद्दिष्ट असून आत्तापर्यंत 3 कोटी 38 लाख इतकी वसुली झाली आहे. उद्दिष्टपूर्तीची उर्वरित रक्कम येत्या 31 मार्च अखेर निश्‍चित स्वरूपात वसूल होईल. 

"उपयोगकर्ता' साठी अडवणूक नाही. 
उपयोगकर्ता कर आकारणीबाबत बोलताना कर निरीक्षक गणी सय्यद म्हणाले, ""अभय योजनेतील दंड, व्याजाच्या माफीची सवलत ही उपयोगकर्ता शुल्कासह घरपट्टी भरणाऱ्यांसाठी आहे. योग्य पद्धतीने पटवून दिल्यास मालमत्ता धारक शुल्क भरतो. मात्र ज्यांची अडचण आहे त्यांना कोणतीही सक्ती केली जात नाही. उपलब्ध असेल तितकी रक्कम आम्ही स्वीकारतो. उपयोगकर्ता शुल्कासाठी कोणाचीही अडवणूक करत नाही. 

थकितांना व्यक्तिगत नोटिसा 
थकीत शुल्क असणाऱ्या मालमत्ता धारकांना व्यक्तिगत नोटिसा बजावण्याचे काम कर निर्धारण व संकलन विभाग यांच्याकडून सुरू आहे. यामध्ये एकूण मागणी, अभय योजनेंतर्गत दंड व्याजातील माफी, प्रत्यक्षात अदा करावयाची रक्कम असा सर्व तपशील नमूद करण्यात आला आहे. 

संपादन : प्रफुल्ल सुतार