सांगली : जिल्ह्यातील तब्बल 120 ग्रामपंचायतींमध्ये झालेल्या एलईडी दिव्यांच्या खरेदी घोटाळ्यावर जिल्हा परिषदेत चकार शब्द काढला जात नाही. मिरज पंचायत समितीत त्यावर गदारोळ होत असताना जिल्हा परिषदेचे सदस्य गप्प का, हा विषय आता चर्चेत आला आहे. सुमारे दोन कोटींहून अधिक रकमेचा गफला करून गाव कारभारी आणि ग्रामसेवकांनी खिसे भरले आहेत. त्याची चौकशी आणि वसुली राहिली बाजूला, त्यातील काही घोटाळेबाजांचा जिल्हा परिषदेत रुबाब सुरु आहे.

'सकाळ'ने कुंडलापूर ग्रामपंचायतीतील एलईडी दिव्यांच्या खरेदीतील घोटाळा उजेडात आणला. त्यानंतर फटाक्‍यांची माळ लागावी त्याप्रमामे तब्बल सव्वाशे ग्रामपंचायतींची नावे या घोटाळ्यात समोर आली आहेत. सुमारे 1300 ते 1700 रुपये किंमतीचे दिवे साडेचार हजार ते आठ हजार रुपयांना खरेदी करण्याचा महाप्रताप गावकारभाऱ्यांनी केला आहे. मिरज पूर्व भागातील एका गावात तर याची टक्केवारी थेट 'आरटीजीएस' म्हणजे बँकेच्या खात्यावर वर्ग करून घेण्याचा प्रताप झाला आहे. हा घोटाळा करताना कोटेशनमध्ये घोळ करण्यात आले आहेत. बोगस कंपन्या दाखवून खरेदी केली आहे. 

गावच्या विकासासाठी आलेल्या पैशांची प्रचंड लूट करण्यात आली आहे. गावकारभारात मुरुम घोटाळ्यानंतर मोठा घोटाळा म्हणून हा चर्चेत आला. त्याची उचित दखल घेऊन तातडीने चौकशीची गरज असताना जिल्हा परिषद प्रशासनानेही वेळकाढूपणा चालवला आहे. 

या घोटाळ्यात नाव असलेल्या काही मंडळींचे दररोज जिल्हा परिषदेत दर्शन होत असते. काही जिल्हा परिषद सदस्य अशा घोटाळेबाजांना घेऊन जिल्हा परिषदेत फिरताना दिसतात. अधिकाऱ्यांकडे त्यांची उठबस सुरु असते. अशा पद्धतीच्या कारभाराने चौकशी होणार कशी आणि कारवाई कशी होणार, याबद्दल साशंकताच अधिक आहे.