Uday Samant on Kiran Samant Post: निवडणुकीच्या पार्श्वभूमीवर राज्याच्या राजकारणात अनेक घडामोडी घडत असतानाच मतदार संघावर दावे प्रतिदावे केले जात असतानाच शिवसेना शिंदे गटाने रत्नागिरी सिंधुदुर्ग मतदारसंघ भाजपसाठी सोडला असल्याची चर्चा राजकीय वर्तुळात सुरू होती, यादरम्यान मोठा ट्विस्ट आला आहे. शिवसेना शिंदे गटाचे आमदार उदय सामंत यांचे बंधू किरण सामंत यांची रत्नागिरी सिंधुदुर्ग लोकसभा मतदारसंघातून माघार घेतल्याची चर्चा राजकारणात सुरू झाली. याचे कारण म्हणजे त्यांनी सोशल मिडीयावर केलेली पोस्ट. तर उदय सामंत यांनी त्या जागेवर आमचा दावा कायम आहे, असं म्हटलं आहे.

विदर्भ दौऱ्यावर असताना माध्यमांशी संवाद साधताना त्यांनी म्हटलं की, मुख्यमंत्री एकनाथ शिंदे यांना त्रास होऊ नये म्हणून किरण सामंत यांनी माघार घेतली होती. मात्र, त्या जागेवर आमचा दावा कायम आहे. काल त्यांनी घेतलेला निर्णय भावनिक होता. मात्र, ही जागा शिवसेनेकडे राहावी अशी कार्यकर्त्यांची मागणी आहे.

रत्नागिरी-सिंधुदुर्ग या मतदारसंघावर शिवसेनेने दावा केला आहे. मात्र, अंतिम निर्णय मुख्यमंत्री एकनाथ शिंदे घेतील. मात्र, हि जागा आमच्याकडे राहावी अशी कार्यकर्त्यांची मागणी आहे. किरण सामंत यांनी केलेलं ट्विट मागं घेतलं आहे, असंही ते पुढे म्हणालेत.

काय केली होती पोस्ट

मा. नरेंद्र मोदीजी पुन्हा पंतप्रधान होण्याकरिता व अब कि ४०० पार होण्याकरिता रत्नागिरी - सिंधुदूर्ग लोकसभा मतदार संघातून किरण सामंत यांची माघार - किरण सामंत.

किरण सामंत यांच्या या पोस्टचे स्क्रिनशॉट सध्या सोशल मीडियात व्हायरल होत आहेत. पण नंतर किरण सामंत यांच्या अकाऊंटवर ही पोस्ट दिसेनासी झाली. काल रात्री उशिरा सोशल मिडीयाच्या माध्यमातून माघार घेत असल्याची घोषणा केली. त्यामुळे आता रत्नागिरी सिंधुदुर्ग मतदार संघातील शिवसेना आणि भाजप यामधील वाद मिटले असल्याची चर्चा राजकीय वर्तुळात सुरू आहे.

केंद्रीय मंत्री नारायण राणे यांच्या कालच्या पत्रकार परिषदेनंतर मोठी राजकीय घडामोड दिसून येत आहे. रत्नागिरी सिंधुदुर्ग लोकसभा मतदारसंघासाठी नारायण राणे यांचा मार्ग मोकळा झाल्याच्या चर्चा आहेत. नारायण राणे आज सिंधुदुर्गमधून प्रचाराचा नारळ फोडण्याची शक्यता वर्तवण्यात येत आहे.