बेळगाव : कर्नाटक सरकारच्या अधिवेशनाला प्रत्युत्तर देण्यासाठी मध्यवर्ती महाराष्ट्र एकीकरण समितीतर्फे आयोजित करण्यात आलेल्या महामेळाव्याला आडकाठी घालण्याचा प्रयत्न कर्नाटक पोलिसांकडून सुरू झाला आहे. मंडप घेण्यासाठी परवानगी घेण्यात आलेली नाही असे कारण सांगत व्हॅक्सिन डेपो परिसरात घालण्यात आलेला मंडप काढण्यासाठी पोलिसांकडून दगडफेक केली जात आहे. मात्र कोणत्याही परिस्थितीत मेळावा यशस्वी करण्याचा निर्धार मोठ्या संख्येने जमलेल्या समिती कार्यकर्त्यांतून केला जात आहे.

मराठी भाषिकांचा विरोध असतानाही कर्नाटक सरकारकडून गेल्या काही वर्षांपासून बेळगावात अधिवेशन घेतले जात आहे. त्याच्याविरोधात अधिवेशनाच्या पहिल्या दिवशी महाराष्ट्र एकीकरण समितीतर्फे भव्य मेळाव्याचे आयोजन केले जाते. मेळाव्याला परवानगी नाही असे सांगत रविवार पासूनच पोलिसांची मोठ्या प्रमाणात दादागिरी सुरू आहे. डेपो परिसराला पोलिस छावणीचे स्वरूप प्राप्त झाले आहे. ठीकठिकाणी कार्यकर्त्यांची अडवणूक केली जात असून सकाळपासूनच कार्यकर्ते मोठ्या संख्येने मेळाव्यासाठी दाखल होऊ लागले आहेत.